Գեղարքունիքի թեմի առաջնորդը` միասեռ ամուսնությունների և գենդերի օրենքի մասին

Մայիսի 20-ին ՀՀ ԱԺ-ի կողմից ընդունված «Կանանց եւ տղամարդկանց հավասար իրավունքների եւ հնարավորությունների մասին» օրենքը հասարակական լուրջ դիմադրության պատճառ դարձավ: Դժգոհությունների հիմնական թիրախն այն է, որ օրենքը, օրինակ, ամրագրում է, որ «գենդերը տարբեր սեռի անձանց ձեռքբերովի, սոցիալապես ամրագրված վարքն է»: «Ձեռքբերովի» տերմինն էլ արժանացել է հոգևորականների, տարբեր կազմակերպությունների դիմադրությանը, որոնք այս օրենքի ընդունման դեպքում լուրջ մարտահրավերներ են տեսնում ազգային արժեքների և դաստիարակության հարցում:

Aravot.am-ի հետ զրույցում այս խնդիրների մասին իր մտահոգությունը հայտնեց նաև Գեղարքունիքի թեմի առաջնորդ Մարկոս Եպիսկոպոս Հովհաննիսյանը: Նա տեղեկացրեց, որ Հանրային խորհրդի կրոնի ենթահանձնաժողովում այս հարցի վերաբերյալ լուրջ ուսումնասիրություն է կատարվել, և դրանց հաջորդած վերլուծությունները օրենքը մշակելու համար նպաստավոր կլինեն:

Մեր այն դիտարկմանը, թե քաղաքացիները, որոնք պայքարում են ընդդեմ օրենքի ընդունման՝ պնդում են, թե օրենքի ընդունումը ենթադրում է միասեռ ամուսնությունների օրինականացում, հոգևորականն այսպես պատասխանեց. «Անշուշտ միասեռ ամուսնություններին ցանկացած հոգևորական դեմ է: Դրա համար էլ օրենքը պիտի լավ ուսումնասիրվի և ճիշտ ձևակերպում ստանա, այլապես կարող է թյուրընկալումների տեղիք տալ: Ներկայիս ձևակերպմամբ օրենքը շատ խոցելի է: Խնդիրն այն է, որ գենդերը մեզ մոտ ընկալվում է` որպես սեռային առանձնահատկություն, իսկ Եվրոպայում ընկալում է այնպես, թե անձը ինչ սեռի է` ըստ իր ընտրության»:

Գեղարքունիքի թեմի առաջնորդը գենդերի մասին օրենքի ընդունման դեմ կազմակերպված հասարակական դիմադրությունը տեղին է համարում: Այն շահարկումներին, թե մեր երկրի վերին օղակներում Եվրոպայից արդեն գումարներ են ստացել, որպեսզի ամեն կերպ ընդունեն գենդերի մասին օրենքը, հոգևորականն այսպես արձագանքեց. «Առանց հավաստի տեղեկությունների` այդպիսի լուրերի հավատալ չեմ կարող»:

Տաթև ՀԱՐՈՒԹՅՈՒՆՅԱՆ