Այսօր Շիրակի մարզի ընդհանուր իրավասության դատարանում շարունակվեց Գյումրու նախկին քաղաքապետ Վարդան Ղուկասյանի դստեր փեսացուի` Կարեն Եսայանի սպանության գործով դատավարությունը: Իրեղեն ապացույցների շարքում հետազոտվելու էր նաև սպանված երիտասարդի ավտոմեքենան, որը գտնվում էր Շիրակի մարզի քննչական բաժնի բակում: Չնայած դատավարությանը մասնակից կողմերը տեղափոխվեցին դատարանից բավական հեռավորության վրա գտնվող քննչականի բակ, սակայն հնարավոր չեղավ զննել մեքենան, քանի որ չկային բանալիները:
Վերադառնալով դատարան` ամբաստանյալ Հարություն Սարգսյանի փաստաբանները դատավոր Մարտին Սարոյանից պահանջեցին պարզաբանել, թե որտեղ են պահվում մեքենայի բանալիները:Դատավորը պարզաբանեց, որ բանալիները Երևանում են` գործը քննող քննիչ մոտ: Սա հարուցեց փաստաբանների զայրույթը: Լուսինե Սահակյանը զարմացած հարցրեց, թե ի՞նչ գործ ունի բանալին քննիչի մոտ, երբ գործը արդեն ուղարկված է դատարան, իրեղեն ապացույցները ևս ուղարկվել են դատարան, իսկ այս քննիչը կենսաթոշակի է անցել ու այլևս չի աշխատում:
Կարդացեք նաև
Դատավորն արդարացավ, թե քննիչը, անցնելով թոշակի, բանալին իր հետ չի տարել, այլ թողել է քննչականում, պարզապես ինքը հարցում է կատարել քննչական բաժին, որտեղից պարզաբանել են , որ այն քննիչի մոտ է: Հարություն Սարգսյանի փաստաբան Հունան Բաբայանն էլ հանդես եկավ հայտարարությամբ` ասելով, որ Կարեն Եսայանի ավտոմեքենան պատշաճ ձևով չէր պահվում և անմխիթար վիճակում էր: Լուսինե Սահակյանն էլ դատավորին խնդրեց գրավոր դիմել քննչական, որպեսզի այս գործով բոլոր իրերը, ապացույցները, փաստաթղթերը տրամադրվեն դատարանին: Դատարանում վեճ ծագեց այսպես ասած «քննչական վարույթ» հասկացության շուրջ:
Փաստաբանները պնդում էին, որ «Քրեական դատավարության» մասին օրենսգրքով նման հասկացություն գոյություն չունի, տվյալ գործին առնչվող բոլոր փաստաթղթերը կարվում են գործին ու համարակալվում: Մինչդեռ դատախազ Արեն Մարուքյանն ու տուժողի իրավահաջորդի շահերը ներկայացանող Արմեն Մելքոնյանը պնդում էին, որ կա նման հասկացություն և որ այդտեղ կարևոր փաստաթղթերի պատճենները պահելուց զատ, քրեական գործի համար էական նշանակություն չունեցող փաստաթղթերն են պահվում: Նրանք մանրամասնեցին, որ գլխավոր դատախազը ոստիկանապետի հետ միասին ներքին կանոնակարգ է մշակել իրենց աշխատակիցների համար, մինչդեռ փաստաբան Լուսինե Սահակյանը պնդում էր, որ այդ ամենը անօրինական է, և եթե դատախազը որոշ մարդկանց համար հեղինակություն է, իրենց համար գոյություն ունի «Քրեական դատավարության» մասին օրենսգիրք:
Լուսինե Սահակյանը միջնորդություն ներկայացրեց դատարանին`առաջարկելով տուժողի իրավահաջորդի շահերը ներկայացնող Վարդուհի Էլբակյանից պահանջել դատարան ներկայացանել Կարեն Եսայանի գրպանում եղած այն իրերը, որոնք քննիչը հանձնել է նրան: Այստեղ ևս լեզվակռիվ եղավ. տուժողի իրավահաջորդի շահերը ներկայացնող Արմեն Մելքոնյանը նշեց, որ սպանվածի գրպանում եղել են կրակայրիչ, ծխախոտ, հեռախոս, որոնք էական նշանակություն չեն ունեցել գործի համար և վերադարձվել են Կարեն Եսայանի մորը:Մինչդեռ Հարություն Սարգսյանի փաստաբան Լուսինե Սահակյանը իր զարմանքն էր հայտնում, թե ինչպես է որոշվել, որ օրինակ`բջջային հեռախոսը էական նշանակություն չի կարող ունենալ գործի համար: « Հարգելի դատարան, հնարավո՞ր է , որ Կարեն Եսայանը ծխախոտի տուփի վրա գրառում արած լիներ, թե ով է իրեն հետապնդում, կարող է հեռախոսով նկարահանումներ կատարած լիներ, հնարավոր է չէ՞, եթե չզննվեն, ինչպե՞ս կարող են որոշել, որ դրանք էական նշանակություն չունեն»,–մանրամասնեց Լուսինե Սահակյանը: Դատարանը միջնորդությունը չքննարկեց, քանի որ, ըստ դատավոր Մարտին Սարոյանի, տուժողի իրավահաջորդի ներկայացուցիչը նախ և առաջ պիտի ճշտի` այդ հեռախոսը գոյություն ունի՞, թե՞ ոչ: Դատավորը ուզում էր հարցաքննել ամբաստանյալ Հարություն Սարգսյանին, սակայն դատախազ Արմեն Մարուքյանը առարկեց` նշելով, որ դեռևս ապացույցների հետազոտումը չի ավարտվել: Դատը հետաձգվեց` սկզբում նշանակվելով վաղը, այնուհետ` նոյեմբերի 6-ին:
Նունե ԱՐԵՎՇԱՏՅԱՆ
