Դատախազ Աշոտ Գրիգորյանը հայտնեց, որ ամբաստանյալների իրավունքները, կապված վկաների առերեսումների հետ՝ չեն խախտվել:
Լոռու մարզի առաջին ատյանի դատարանում, դատավոր Նարինե Հովակիմյանի նախագահությամբ, շարունակվում է շուրջ մեկ տարի առաջ «Մուշ» ռեստորանում փաստաբան Սամվել Շարբաթյանի սպանության մեջ մեղադրվող Սամվել Դիլոյանի, Արտակ եւ Արեն Վերանյանների դատաքննությունը:
Նախորդ դատական նիստերից մեկի ժամանակ Սամվել Դիլոյանի եւ Արեն Վերանյանի փաստաբան Ռուբեն Հակոբյանը դատարանում բացարկ էր հայտնել մեղադրող դատախազ Աշոտ Գրիգորյանին: Վերջինս դատարանից ժամանակ էր խնդրել փաստաբանի բացարկին պատշաճ կերպով պատասխանելու համար:
Այսօրվա դատական նիստի ժամանակ դատախազ Աշոտ Գրիգորյանը հանդես եկավ առարկությամբ, հայտնեց, որ բացարկն անհիմն է եւ պետք է մերժել:
Կարդացեք նաև
Նա հայտնեց, որ ամբաստանյալների իրավունքները, կապված վկաների առերեսումների հետ, չեն խախտվել:
«Որոշ դեպքերում, ճիշտ է, առերեսումներ չեն կատարվել, սակայն դա միտումնավոր չի եղել»,-ասաց Աշոտ Գրիգորյանը` հավելելով, որ նախաքննական մարմինը ըմբռնումով է մոտեցել տուժողի ընտանիքի անդամների նկատմամբ` հաշվի առնելով նրանց հոգեկան վիճակը:
Փաստաբան Ռուբեն Հակոբյանը նկատեց, որ իրենք չեն պահանջել տուժողի կնոջ հետ առերեսում անել:
«Կա խոհարար, որը ոչ մի կողմից բարեկամ չէ: Նրա հետ առերեսում ընդհանրապես չի արվել, վերջինս Հայաստանից հեռացել է»,-ասաց Ռուբեն Հակոբյանը:
Դատավոր Նարինե Հովակիմյանը, սակայն, մերժեց փաստաբանի`դատախազին եւ Լոռու մարզի դատախազությանն ուղղված բացարկը:
Անուշ ԲՈՒԼՂԱԴԱՐՅԱՆ
