Այսօր Peoplemeter ակումբում Տարածաշրջանային հետազոտությունների կենտրոնի տնօրեն Ռիչարդ Կիրակոսյանը անդրադարձավ տարածաշրջանային զարգացումներին:
Ռիչարդ Կիրակոսյանը գտնում է, որ այս պահին Հայաստանի առավելությունը տարածաշրջանային մյուս պետությունների համեմատ կայանում է նրանում, որ Հայաստանը մի բան է առաջարկում, ինչը չեն առաջարկում մյուս հարեւանները, իսկ դա` կայունությունն է. «Հայաստանն ի համեմատ մյուսների` առավել կայուն երկիր է, սակայն այս կայունությունը վտանգի տակ է»:
Ռիչարդ Կիրակոսյանի խոսքով` ՀՀ նախագահը դեռեւս չի կարողացել բացատրել Մաքսային միության ընտրության պատճառը. «Հայաստանում գրեթե ոչ ոք չգիտի այս որոշման հանգամանքների մասին: Ես սխալ եւ կորցրած հնարավորություն չեմ համարում սա, բայց այս որոշման հետ մի բան այն չէ, եւ որպես հանրային ոլորտի ներկայացուցիչներ մեր խնդիրը պետք է լինի դեբատների միջոցով այս մասին առավել շատ խոսելը»:
Ռիչարդ Կիրակոսյանը գտնում է, որ Բելառուսիան եւ Ղազախստանը այնքան էլ հակված չեն Հայաստանին Մաքսային միություն ընդունելու:
Ըստ նրա`մեր նախագահն ու վարչապետը ուրախ էին եվրոբոնդերի հետ կապված, ինչը, ցավոք, Հայաստանում ներդրումների վրա կունենա ազդեցություն. «Ներդրողները ցանկանում էին ներդրում անել այնպիսի երկրում, որը ավելի մոտ է Եվրոպական երկրներին: Բայց կա մի հանգամանք, մենք դեռ վստահ չենք, որ Հայաստանը կանդամակցի Մաքսային միությանը: Սեպտեմբերի երեքին Սերժ Սարգսյանի եւ Վլադիմիր Պուտինի հանդիպումը ուղղված էր, նրան, որ Հայաստանը այո ասի Մաքսային միությանը, եւ ոչ` Եվրոպականին»:
Կարդացեք նաև
Ռիչարդ Կիրակոսյանի ձևակերպմամբ`Սերժ Սարգսյանը շախմատ սիրող անձնավորություն է եւ Հայաստանը այս պարագայում`«Հայաստանը շախմատի տախտակի վրայի զինվոր է: Հայաստանը կարեւոր դիրք չէ գրավում այդ տախտակի վրա: Դեռ հստակ չէ, թի ինչ օգուտներ կունենա Հայաստանը Մաքսային միությունից եւ ի վերջո սա վիրավորանք էր Հայաստանի իշխանությունների համար: Հայ-ռուսական հարաբերությունները կարեւոր են, սա նշանակում է, որ Հայաստանի տնտեսությունը պատանդ կդառնա Ռուսաստանի, Բելառուսի եւ Ղազախստանի տնտեսություններին: Մի բան հստակ է`սեպտեմբերի երեքից հետո Հայաստանը տարածաշրջանում ավելի բարենպաստ վիճակում է»:
Եվա ՀԱԿՈԲՅԱՆ
