Ագրարագյուղացիական միավորման նախագահ Հրաչ Բերբերյանը Aravot.am-ին վստահեցնում է, որ Հայաստանի ֆերմերների միության նախագահ Ռոզա Ծառուկյանի հրաժարականի ու նեղանալու պատճառը միայն որդուն շնորհակալագիր չտալու պատճառով չէ:
«Գյուղնախարարը տիկին Ծառուկյանին վերջում է որոշել հրավիրել՝ նախատոներից հետո: Համենայնդեպս, ավելի լուրջ պատճառներ կան, որ նա հրաժարական է որոշել տալ: Պատճառները նրանից հարցրեք, ես չեմ, որ ասելու եմ: Այդ կինը այնքան մեծ լումա է դրել գյուղատնտեսության մեջ, նա այսօր Հայաստանում մեծ գործ է անում, եւ նրան նեղացնելը անբարոյականություն է:
Տիկին Ծառուկյանը բոլոր ֆերմերներին ճանաչում է ու լավ տարբերում է արժանիներին ոչ արժանիներից: Մեր հանրապետությունում պետական պաշտոնյան ինչ ուզում է, անում է: Կարծում եմ, որ Հայաստանում ձեւավորվել է մի թիմ, որ իրենք իրենց նվերներ են տալիս, ուրախանում են: Պարզ էլ չէ՝ ովքեր էին հրավիրված, էդ ինչ ֆերմերներ էին: Ես ինքս այդ նույն պարգեւից 5 տարի առաջ հրաժարվել եմ, Դավիթ Լոքյանն էր ներկայացրել պարգեւատրման, որովհետեւ կարծում էի՝ ավելի լավ էր հողի մշակը ստանար: Այդ պարգեւը մարդու կենսագրությունում որեւէ նշանակություն չի կարող ունենալ…մի երկաթի, թե թղթի կտորով կպարգեւատրեն կարեւոր չէ ու հարաբերական է»:
Հիշեցնենք, որ տիկին Ծառուկյանը նեղացել էր, որ գյուղատնտեսի օրվա կապակցությամբ իր որդուն՝ Գագիկ Ծառուկյանին, գյուղնախարարն անգամ շնորհակալագրի չէր արժանացրել ու պարգեւատրել էր մի շարք ֆերմերների, որոնց որպես ֆերմերների միության նախագահ ինքն անգամ չէր էլ ճանաչում:
Կարդացեք նաև
Արփինե ՍԻՄՈՆՅԱՆ
