Արմավիրի մարզի ՀՔԾ քննիչ Ա.Մարտիրոսյանի վարույթում է քննվում կողոպուտի փաստով հարուցված թիվ 57111413 քրեական գործը, որը մինչ այդ գտնվել է Վաղարշապատի քննչական բաժանմունքի քննիչ Է.Բաբայանի վարույթում: Տվյալ գործով մեղադրյալ է ներգրավվել Երևանի բնակիչ Վահագն Արտաշեսի Ղազարյանը ՀՀ քր.օր-ի 176 հոդ.1-ին մասով, ՀՀ քր. օր-ի 176 հոդ. 2 –րդ մասի 2 –րդ կետով և ՀՀ քր.օր-ի 176 հոդ. 2-րդ մասի 2-րդ կետով հանցանք կատարելու համար:
Վահագն Ղազարյանի պաշտպան, ՀՀ փաստաբանների պալատի անդամ Ամալյա Ավագյանը բաց նամակով դիմել է ՀՀ գլխավոր դատախազ Գեւորգ Կոստանյանին, իր պաշտպանյալի խափանման միջոցը այլ միջոցով` ստորագրություն չհեռանալու մասին, փոխելու խնդրանքով:
Պաշտպանը տեղեկացրել էր գործի նախապատմությունը: Ըստ գործի նյութերի, այս տարվա հունիսի 23-ին ժ.14:10-ի սահմաններում Երևանի Բագրատունյաց պողոտայի 12 շենքի մոտ կայանած «Մերսեդես c 240 » 22uu 806 պետհամարանիշի ավտոմեքենայում նստած , Նաիրա Վարդանյանից Վ.Ղազարյանը «բացահայտ հափշտակել» է 565.000 ՀՀ դրամի ոսկե շղթան:
Մեկ այլ դրվագով էլ, դեպքից մեկ օր առաջ նա Աստղիկ Բարսեղյանի պարանոցից պոկել էր եւ «բացահայտ հափշտակել» էր զգալի չափերի` 100 հազար դրամի արժողության պարանոցի շղթան: Նախաքննության մարմինը մեկ տարի առաջ էլ կատարված գողությունը` «Արմ Աստղ» հացատան մոտակայքում Թաիրով գյուղի բնակչուհի Ռուզաննա Երանյանի պարանոցի ոսկե շղթայի, նույնպես վերագրել էր Վ.Ղազարյանին:
Կարդացեք նաև
Փաստաբան Ամալյա Ավագյանը գլխավոր դատախազին ուղղված նամակում հայտնում է, որ «ՀՀ քրեական դատավարության օրենսգրքի 135 հոդվածում թվարկված մեղադրյալի հավանական գործողությունների մասին հետևությունները, որոնք կարող են առաջ բերել անձի ազատության և անձեռնմխելիության հիմնական իրավունքի սահմանափակում, պետք է հիմնված լինեն գործի նյութերից բխող ողջամիտ ենթադրությունների վրա»:
Նա նշում է Եվրոպական դատարանում ավարտված Բարանովսկու վերաբերյալ և «Ջեսուսն ընդդեմ Լիտվայի» գործերերը, որով ըստ փաստաբանի, « Դատարանը կրկնում է, որ կալանավորի կարգավիճակը կանոնակարգող հստակ նորմերի բացակայության պատճառով՝ անձին առանց իրավական հիմքի կալանքի տակ պահելու պրակտիկան, որի արդյունքում անձը կարող է առանց դատական թույլտվության`ազատությունից զրկվել անսահմանափակ ժամանակով, չի համապատասխանում իրավական հստակության և կամայականությունից պաշտպանվելու սկզբունքներին,որոնք հանդիսանում են Կոնվենցիայի և իրավական պետության ընդհանուր գաղափարները»:
Փաստաբանը հայտնում է, որ իր պաշտպանյալն առաջադրված մեղադրանքներում իրեն մեղավոր չի ճանաչել և «ենթադրյալ տուժողների հետ առերես հարցաքննություններին ամբողջովին հերքել է մեղադրանքը, և հարցադրումներով ապացուցել, որ տուժողները իրեն զրպարտում են ու այլ անձի փոխարեն իրեն են մեղադրանքի թիրախ դարձրել»:
Պաշտպանը տեղեկացնում է, որ Վ.Ղազարյանը «Նուբարաշեն» քրեակատարողական հիմնարկից բողոք է ուղարկել ՀՀ ոստիկանապետ Վ.Գասպարյանին և Մարդու իրավունքների պաշտպան Կ.Անդրեասյանին, իրեն անօրինական, անմեղ լինելու պարագայում ազատազրկելու համար, խնդրելով նրանց հսկողություն իրականացնել այս քրեական գործի քննության նկատմամբ:
Նախաքննության հետ կապված մենք նույնպես տեղեկացրել էինք, որ այս գործով պաշտպանական կողմը հարցումներ էր կատարել «Գրանդ տոբակո» ընկերությանը, որտեղ Ղազարյանն աշխատել է, որպես ֆիլտրի արտադրամասի մեքենավար կարգավորող: «Համաձայն «Գրանտ Տոբակո » ՀԿ ՀՁ ՍՊԸ 14.08.2013 թ. թիվ Ե-352 գրության, պաշպանության կողմին է տրամադրվել «Գրանտ Տոբակո» ընկերության աշխատակից Վահագն Ղազարյանի վերաբերյալ ս.թ. հուլիսի 23 , 26, 27-ին ընկերության մուտքի և ելքի տեսաձայնագրությունները և համակարգչային տվյալները: Համաձայն այդ տեսագրության «Ս.թ. հուլիսի 26-ին երեկոյան և հուլիսի 27-ին առավոտյան Վ.Ղազարյանը եղել է չսափրված»: Մինչդեռ ըստ պաշտպանի, տուժողի կողմից քննությանը ներկայացված հուլիսի 26-ի տեսաձայնագրության անձը սափրված է և «դժվար թե մեկ գիշերվա ընթացքում մարդու երեսը մազածածկվի»:
Գլխավոր դատախազին պաշտպանը տեղեկացնում է, որ 04.04.2012թ.-ի դրվագով ` ավելի քան մեկ տարի առաջ կատարված դեպքով Վ.Ղազարյանին «հանդիսավոր կերպով» տարել են տուժողի տուն և ներկայացրել, որ նա իրեն կողոպտողն է, ապա բերելով քննիչի մոտ կատարել են «ճանաչում» քննչական գործողությունը:
Ռուզան ՄԻՆԱՍՅԱՆ
