Մաշտոցի պուրակում «Ազատագրենք հուշարձանը օլիգարխից» նախաձեռնության անդամներին այսօր սպասում էին «կարմիր գլխարկները»`ԱԺ պատգամավոր Սամվել Ալեքսանյանի աջակիցները:
Ակտիվիստների հավաքվելուց հետո սոցիալիստական շարժման ղեկավար Ռոբերտ Ահարոնյանը իրենց ակտիվիստներին` «կարմիր գլխարկներին» հավաքվելու կոչ արեց, հետո շարունակեց. «Այսօր հավաքվել ենք պուրակում հայտարարելու, որ պուրակը ոչ մեկի կողմից սեփականաշնորհված չէ, եւ պարտավոր ենք ասել, որ «Փակ շուկան» շահագործվում է եւ ճարտարապետական ոչ մի փոփոխության չի ենթարկվել: Հուշարձանը վերականգնվել է: Այն մարդկանց, որոնք փորձում են շահարկել, անուններ տալ, մեղավոր գտնել, մենք պետք է միաձայն ասենք, որ Հայաստանում ոչ ճիշտ շարժում են սկսել: Սկսել են քայլեր անել այն մարդկանց դեմ, որոնք իրենց գործունեությունն ու բիզնեսը ծավալում են Հայաստանում: Այն մարդկանց դեմ, որոնք ոչ թե արտահանում են իրենց գումարները , այլ Հայաստանում ստեղծում աշխատատեղեր: Հարց եմ ուզում տալ, իսկ այն կողմը, որ դեմ է շուկայի շահագործմանը, գոնե մեկ աշխատատեղ ստեղծե՞լ է , թե՞ոչ»:
Շուկայի ազատագրման նախաձեռնության անդամ Տիգրան Խզմալյանն էլ հակադարձեց Ռոբերտ Ահարոնյանին. «Պուրակն ազատագրել ենք բոլորի, այդ թվում նրանց համար, թող օգտվեն: Այն, որ ընտրել են կարմիր գլխարկները, ծիծաղելի է: Նրանց արդեն ղըզըլ-բաշ ենք անվանել, կարմիր գլխարկներ: Որքան մեզ հայտնի է պատմությունից, թուրքական ղըզըլ-բաշ ցեղերը անունով են եկել այստեղ, դա նշանակում է ղըզըլ-բաշերը արդեն քաղաքի կենտրոնում են, փորձում են գրավել քաղաքը ներսից»:
Կարդացեք նաև
Տիգրան Խզմալյանի խոսքով, «կարմիր գլխարկների» տերերը նրանց վարձել են, որ քաղաքացիական բախումներին նպաստեն. «Իրենց այստեղ բերողները եւ մարդիկ, որոնք իրենց վարձն են տալիս, քաղաքացիական բախումներ եւ պատերազմ են պատրաստում: Ամեն ինչ կանենք, որ դա չլինի»:
Պուրակում ակտիվիստները կատակում էին, թե բազմազանության նոր շքերթ է սկսվել` նկատի ունենալով դեղին ու կարմիր գլխարկավորներին:
Շուկան ազատագրողների նախաձեռնությունը այսօր պուրակում հայտարարեց, որ ակցիա չեն անելու` դերասան Վարդան Պետրոսյանի հետ կատարված վթարի պատճառով:
Արփինե ՍԻՄՈՆՅԱՆ
