«Դանդի փրիշս մեթալս Կապան» ՓԲ ընկերությունում նոր դեպք է գրանցվել: Ինչպես տեղեկացանք ընկերությունից՝ հոկտեմբերի 19-ին հանքում ամրակապման աշխատանքների ժամանակ ապարաբեկորը ընկել և հարվածել է «Բումեր»-ի մեքենավարի ոտքին: Նա ստացել է ձախ ոտնաթաթի կոտրվածք, տարածուն մկանների սալջարդ: Տուժողն անմիջապես տեղափոխվել է Կապանի հիվանդանոց: Դեպքը տեղի էր ունեցել երեկոյան ժամը 22-ի սահմաններում եւ 22:10-ին հանքի աշխատակից 42-ամյա Մ.Մ.-ն արդեն Կապանի բժշկական կենտրոնում էր գտնվում: Վերջինս այս պահին դեռ բժշկական կենտրոնի վնասվածքաբանական բաժանմունքում բուժում է ստանում:
Բաժանմունքի վարիչ Սարիկ Աթաջանյանի խոսքով՝ հիվանդն իրեն լավ է զգում եւ առաջիկա օրերին դուրս կգրվի հիվանդանոցից: «1-2 օր էլ կհետազոտենք, բուժումները կստանա եւ տուն կգնա: Ձախ ոտնաթաթին ստացած վնասվածքը թեթեւ է, ոչ մի լուրջ վտանգ չկա, մի քանի օր ստացիոնար բուժում կստանա, այնուհետեւ՝ շարունակությունն ամբուլատոր պայմաններում», – ասաց բժիշկ Աթաջանյանը: Շաբաթ օրը երեկոյան տեղի ունեցած դեպքի ժամանակ այլ աշխատակիցներ, բարեբախտաբար, չեն վնասվել:
Մերի ՍՈՂՈՄՈՆՅԱՆ
