Այսօր «Նովոստի» միջազգային մամուլի կենտրոնում Հավաքական անվտանգության պայմանագրի կազմակերպության (ՀԱՊԿ) գլխավոր քարտուղար Նիկոլայ Բորդյուժան, դիտարկմանը`Վիլնյուսում հնարավոր ստորագրվելիք փաստաթուղթը կազդի՞, արդյոք, ՀԱՊԿ-Հայաստան հարաբերությունների վրա, թե՞ ոչ, հայտարարեց, որ այդ ամենի պատասխանը տրվել է Մաքսային միությանը միանալու վերաբերյալ սեպտեմբերի 3-ին Հայաստանի հնչեցրած որոշման հայտարարությամբ:
Նիկոլայ Բորդյուժան խոսելով 2013 թվականի ընթացքում ՀԱՊԿ-ի ծավալած գործունեության մասին, հայտնեց, որ վերջին տարում ՀԱՊԿ-ի ուշադրության կենտրոնում եղել է մասնավորապես 2014 թվականին Աֆղանստանից արեւմտյան զորամիավորումների դուրսբերման հարցը, թմրամիջոցների ապօրինի շրջանառության դեմ ծավալվող պայքարը: Նիկոլայ Բորդյուժան անդրադարձավ նաեւ ՀԱՊԿ-ի արագ արձագանքման ուժերին նորագույն զինատեսակներով համալրելուն, տեղեկացնելով, որ արդեն համաձայնագիր է ստորագրվել եւ, որ ՀԱՊԿ-ի անդամ ղեկավարների կողմից գործընթացն իրականացվելու է այնպես, ինչպես որ եղել է նախնական պայմանավորվածությունը:
Նիկոլայ Բորդյուժան ի պատասխան հարցի` արդյոք ՀԱՊԿ-ում քննարկվե՞լ է ՀՀ նախագահ Սերժ Սարգսյանի կողմից կազմակերպության վերջին գագաթաժողովում ՀԱՊԿ-ի որոշ անդամների դիրքորոշման քննադատությունը, ասաց, թե ՀՀ նախագահն այդ ժամանակ ընդամենը բարեկամաբար է քննադատել. «Սերժ Սարգսյանը բարձրացրել է ՀԱՊԿ-ի որոշ անդամների կողմից ոչ բարեկամական փաստաթղթերի ընդունմանը մասնակցելուն հարցը, իսկ դա սուր քննադատություն չէր: Այդպիսի հարցեր սովորաբար ՀԱՊԿ-ի բոլոր անդամ երկրների նախագահների կողմից էլ կարող են հնչել»:
Եվա ՀԱԿՈԲՅԱՆ
