Այսօր ազատամարտիկ Սուրեն Սարգսյանը, ներկայացնելով ազատամարտիկների եւ կուսակցությունների կլոր սեղան քննարկումների արդյունքները՝ ասաց, որ ՀՅԴ-ն այդ քննարկումներին չի մասնակցել: Թե ինչու՝ նրա մեկնաբանությամբ. «Ինձ թվում է՝ դեռ պաշտոնները բաժանում են, դեռ չեն ստացել վերջնական: Մեկը դեսպան է դառնում, մյուսն ինչ է դառնում: Դա շատ կարեւոր էր, բարձր խոսելուց շատ ավելի կարեւոր՝ գալ եւ նստել իր ազատամարտիկի կողքին: Չեկան: Աստված իրանց հետ»:
ԲՀԿ-ի հետ կապված Սուրեն Սարգսյանը նշեց, որ ԲՀԿ-ն եկավ, իր կարծիքն արտահայտեց եւ դա շատ նորմալ է. «Բոլորին մենք ենք ստեղծել: Հիմա մեկն ասում է՝ վաաաա՜յ, Գագիկ Ծառուկյանը օլիգարխ է, չգիտեմ ինչ է, էդ բոլորին մենք ենք ծնել: Լավ է, վատ է, շատ է, քիչ է՝ մերն են: Մենք անպետք մարդ չունենք: Մենք ուզում ենք բոլորով ուս ուսի տանք»:
Եվրախորհրդարանի հետ կապված էլ Սուրեն Սարգսյանն ասաց, որ առաջարկել են, հանդիպել են Ժիրայր Սէֆիլյանին, բայց արձագանք չկա. «Առաջարկում են, որ մենք իրենց միանանք: Մենք միացման որեւէ խնդիր չենք լուծում, մենք պարզապես փորձում ենք բոլորի ուժերը համատեղել: Նախախորհրդարանն առաջարկում է գնալ առաջ իրենց ծրագրով: Ես համալսարան ավարտած մարդ եմ, դպրոցում էլ վատ չեմ սովորել, ես Նախախորհդարանի ծրագիրը չհասկացա, գուցե ես դոդ եմ, չեմ կարողանում ընկալել: Ժամանակն էլ ապացուցեց այս տարիներին, որ ընկալում դժվար է գտնում: Գուցե լավն է ծրագիրը, բայց մարդկանց մոտ չի ընկալվում: 20 հոգով պտտվում են, 15 հոգով միտինգ անում, չի լինում: Ուրեմն ինչ-որ բան այն չի: Դրա համար մենք առաջարկեցինք աշխատենք, բայց առայժմ արձագանք չունենք պարոն Սէֆիլյանից»:
Նա հայտարարեց, որ քննարկումների համար իրենց դռները բաց են. «Մենք միայն չենք հրավիրել կցորդ, մուտանտ կուսակցություններին: Արտաշես Գեղամյան էդ երեւույթը ԱԺ մտավ ՀՀԿ-ի ցուցակով: Եթե ՀՀԿ-ն հարկ կհամարի, որ իրեն Արտաշես Գեղամյանը ներկայացնի՝ խնդրեմ, մենք ՀՀԿ-ի հետ գործ ունենք»:
Կարդացեք նաև
Հռիփսիմե ՋԵԲԵՋՅԱՆ
