«Պայքար Եվրոպայում խտրականության, այլատյացության և անհանդուրժողականության դեմ» թեմայով այսօր Մարիոթ հյուրանոցում անցկացվող բարձրաստիճան խորհրդաժողովին չհրավիրված մի շար կազմակերպությունների ներկայացուցիչներ առավոտից բողոքի ակցիա են անցկացնում հյուրանոցի դիմաց:
«Դժվար թե, եթե հրավիրված լինեի, մտնեի ներս, որովհետեւ ինձ համար ցինիզմ է, երբ որ երկրում կան DIY ակումբի դեպքերը, հարձակումներ` LGBT-ի առաջնորդների վրա: Եվ հիմա այսպիսի համաժողով անցկացնելն ու կազմակերպելն ուղղակի ցինիզմ է»,- ասաց իրավապաշտպան Միքայել Դանիելյանը:
Նրա խոսքով, այդ համաժողովին պետք է պարտադիր մասնակցեին «Pink Armenia» եւ «Կանանց ռեսուրսների» կենտրոնի ներկայացուցիչները. «Դա երեկ կարողացանք հասցնել ԵԽ մարդու իրավունքների հանձնակատարին»:
Կարդացեք նաև
«Pink Armenia»-ի ներկայացուցիչ Մամիկոն Պետրոսյանն էլ ասաց` ուզում են երկրում արդարադատությունը վերականգնել. «Եթե արդարադատությունը վերականգնվի, նման հանցագործները, որ ռասիզմի, ֆաշիզմի կոչերով են հանդես գալիս, պատասխանատվության կենթարկվեն»:
Նրա խոսքով, իշխանությունները այլատյացության, անհանդուրժողականության մասին իրավունք չունեն խոսելու, եթե սպորտի եւ երիտասարդության փոխնախարար Խաչիկ Ասրյանը հայտարարում է, որ ԱԺ «Ժառանգություն» խմբակցության պատգամավոր Զարուհի Փոստանջյանին պետք է վառել խարույկի վրա, եթե ԱԺ պատգամավոր Արծվիկ Մինասյանը հովանավորում է DIY ակումբի վրա հարձակվող երիտասարդներին:
Ակցիայի ժամանակ դուրս եկան հյուրանոցի անվտանգության աշխատակիցները, ակտիվիստներից պահանջեցին հեռու գնալ հյուրանոցի մուտքից:
«Եթե գամ, ձեր տան դիմաց կանգնեմ, չե՞ք խնդրի, որ մի քիչ այն կողմ կանգնեմ: Սա էլ իմ աշխատավայրն է»,- ասաց հյուրանոցի աշխատակից ակտիվիստներին: Միքայել Դանիելյանն էլ ասաց` «Եկեք իմ աշխատավայրի դիմաց կանգնեք, դեմ չեմ»:
«Որտե՞ղ է ձեր աշխատավայրն ասեք, վաղը ես այս նույն ցուցապաստառով կգամ ձեր աշխատավայրի դիմաց կկանգնեմ»,- ասաց հյուրանոցի աշխատակիցը:
Ակցիայով հետաքրքրվում էին արտասահմանցիները: Ակտիվիստ Արթուր Գրիգորյանը նրանց հերթով բացատրում էր ինչից են դժգոհ ու ինչ են պահանջում:
Մանրամասները՝ տեսանյութում
Արփինե ՍԻՄՈՆՅԱՆ
