Հոկտեմբերի 18-ին Երևանի «Մոսկվայի տանը» տեղի ունեցավ ռուս գրող Յուրի Պոլիկովի «Ընկածների երկինք» վեպի հայերեն թարգմանության և դրա հիման վրա նկարահանված ֆիլմի շնորհանդեսը: Ֆիլմի ռեժիսորն է Վալենտին Դոնսկոյը, գլխավոր դերերում են Կիրիլ Պլետնևը և Անաստասիա Պանինան: Ֆիլմը դեռ չի ցուցադրվել Մոսկվայում, այնտեղ նրա շնորհանդեսը տեղի է ունենալու միայն փետրվարին:
Յուրի Պոլիկովը շնորհանդեսի ընթացքում հանդիսատեսին ներկայացրեց իր «Ընկածների երկինք» վեպը. «Հին վեպ է, գրված 90-ականների վերջերին: Այն բավականին հայտնի է Ռուսաստանում. ֆիլմ է նկարահանվել նրա հիման վրա, այն բեմադրվել է, թարգմանվել է մի շարք լեզուներով»: Ֆիլմի ընթացքում գործարար Պավել Շարմանովը գնացքում պատահական մի գրող-լրագրողի պատմում է իր կյանքի պատմությունը. ինչպե՞ս է ամուսնացել, ինչպե՞ս է փող վաստակել, ինչպե՞ս է սիրել և ինչպե՞ս է սպանել: Գործարարը պահանջում է գրել իր կյանքի պատմությունը՝ փոխելով նրա ավարտը: Սակայն այդպես էլ չի հասցնում ներկայացնել Շարմանովին իր պատկերացրած ավարտը:
Գլխավոր դերակատար Կիրիլ Պլետնևը շնորհանդեսի ընթացքում հայտարարեց, որ ֆիլմում նկարվել է հիմնականում հեղինակի պատճառով՝ «Ես գիտեի, որ Պոլիկովն է հեղինակը, իսկ դա նշանակում է՝ դերասանի խաղ կա»: Ֆիլմի ռեժիսոր Վալենտին Դոնսկոյը իր երիտասարդ տարիները նմանեցնում է ֆիլմի գլխավոր հերոսի հետ. «Այսպիսով` մենք գիտեինք այն, ինչ նկարում ենք: Մեր գիտելիքները կհամընկնեն ձեր գիտելիքների հետ, և դուք հաճույք կստանաք մեր աշխատանքից»:
Aravot.am-ի հետ զրույցում ռեժիսորը նշեց, որ դեպքերը հիմնված է սովետական ռուս իրականության հիման վրա և գլխավոր հերոսը ընդհանրացված կերպար է. «90-ական թվականներին մեր ռուս գործարարների կեսը զոհվեց, ինչպես մեր հերոսը, կեսը անհաջողակ դարձավ: Երիտասարդների մասին է, որոնք ցնդել էին փողերից և նրանցից շատերը չէին դիմանում՝ զոհվում էին: Բայց մեր հերոսին ուրիշ բան սպանեց՝ սերը, ավելի ճիշտ դրա բացակայությունը»: Ռեժիսորի խոսքով՝ ֆիլմի շնորհանդեսը առաջինը Երևանում է կայացել, քանի որ պարզապես համընկել է վեպի հայերեն թարգմանության շնորհանդեսի հետ:
Ամի ՉԻՉԱԿՅԱՆ
