«Սա ձեռնարկ է, որի հիմքում ընկած է դասընթացների շարք դպրոցների համար, ձեռնարկը ուղղված է ուսուցիչներին, ձեռնարկի մաս է կազմում ստեղծագործական խաղ, որը ուղղված է դպրոցականներին և, որը կարող է գնալ դպրոցներ ոչ միայն ուսուցիչների միջոցով, այլ նաև այլ ազատ անհատների միջոցով»,- հոկտեմբերի 18-ին «Մեդիագրագիտություն» ձեռնարկի և «Մեդիամարտ» խաղի շնորհանդեսի ընթացքում հայտարարեց Մեդիա նախաձեռնությունների կենտրոնի (նախկին «Ինտերնյուս» ՀԿ) գործադիր տնօրեն Նունե Սարգսյանը:
Ձեռնարկը նախատեսված է բարձր դասարանների աշակերտների համար, այն պարունակում է 10 թեմա, որոնց համապատասխան տեսաձայնային և տեքստային նյութեր կան: Ձեռնարկը երաշխավորվել է Կրթության և գիտության նախարարության կողմից որպես ուսումնաօժանդակ նյութ դպրոցների համար: Դասընթացը փորձարկվել է մի քանի դպրոցներում և ուսուցիչների վերապատրաստման դասեր են կազմակերպվել Երևանում և մարզերում: Վերապատրաստվել է մոտ 60 ուսուցիչ, մինչև տարվա վերջ այդ թիվը կհասնի 100-ի: Շնորհանդեսի ընթացքում մրցութային կարգով ընտրված 5 դպրոցների ուսուցիչները շնորհվեցին պատվոգրեր և դրամաշնորհներ իրենց դպրոցներում դասընթացը անցկացնելու համար:
Թիվ 69 դպրոցի փոխտնօրեն Կարինե Սամվելյանը նշեց, որ իր աշակերտները անհամբերությամբ են սպասում մեդիագրագիտության դասին: Տիկին Սամվելյանը կարծում է մեդիագրագիտությունը ունիվերսալ գիտություն է՝ այն կիրառելի է բոլոր առարկաների հետ. «Մեկ տարի առաջ, երբ մասնակցեցի այս դասընթացին, շատ-շատ նոր և հետաքրքիր էր այս ասպարեզը: Ասպարեզը ես գտա, զուտ, որոնելով նորարական մոտեցումներ համացանցում իմ առարկայի բնագավառում և հասա այն կետին, որ կա մանկավարժության մեջ մի նոր ուղղություն, որ կոչվում է մեդիագրագիտություն»:
Կրթության ազգային ինստիտուտի փորձագետ Լուսինե Ալեքսանյանը շնորհանդեսի ընթացքում հայտարարեց, որ կարծում է՝ առարկան երեխաներին դուր է գալիս, քանի որ ստիպում է նրանց քննադատաբար մտածել. «Մենք հաճախ դպրոցում տալիս ենք «ի՞նչ» հարցը և ակնկալում ենք այդ «ի՞նչ» հարցի պատասխանը, այն ինչ մենք պետք է տանք «ինչպե՞ս», «ինչո՞ւ» հարցերը և երեխաներից պետք է այդ հարցերի պատասխանները ակնկալենք: Այս ձեռնարկը այդ «ինչպե՞ս» և «ինչո՞ւ» հարցերն է տալիս աշակերտներին և ոչ միայն աշակերտներին»:
Կարդացեք նաև
Ծրագրի ղեկավար Լուսինե Գրիգորյանը պատկերացնում է մեդիագրագիտությունը, որպես առանձին առարկա, իսկ որևէ այլ առարկայի մեջ ներառելու դեպքում՝ պատկերացնում է հասարակագիտությունը. «Սա հասարակությունը հասկանալու, քո շրջապատը հասկանալու, մեդիան քո կյանքում հասկանալու և մեդիայի միջոցով աշխարհը հասկանալու մասին առարկա է: Ինպե՞ս են գովազդը, լուրերը, ֆիլմերը, երաժշտությունը ազդում քո վրա՝ որպես պատանի, ի՞նչ ես քաղում նրանցից»:
Ամի ՉԻՉԱԿՅԱՆ
