Հոկտեմբերի 15-ին Muse-ը հրապարակեց իրենց գալիք նոր համերգային տեսաֆիլմի՝ Live At Rome Olympic Stadium-ի թրեյլերը: Տեսաֆիլմը նկարահանվել է խմբի 2013թ. շրջագայության ընթացքում: Այն կհայտնվի էկրաններին նոյեմբերի 6-ին:
Facebook-ում Muse-ի պաշտոնական էջում հոկտեմբերի 15-ին գրառում արվեց, որում ասվում է. «Մենք ուրախ ենք հաստատել բոլորովին նոր Muse – Live At Rome Olympic Stadium ֆիլմի թողարկումը: Դա 4K Ultra High Definition որակով երբեւէ նկարահանված առաջին համերգային ֆիլմն է: Նոյեմբերի 5-ին 20 կինոթատրոններ 20 քաղաքներում կհյուրընկալեն հատուկ նախնական դիտումներ՝ բացառապես 4K որակով, եւ դուք կարող եք այնտեղ լինել: Տոմսերն արդեն վաճառքում են: Այնուհետեւ, նոյեմբերի 6-ին կկայանա դրա համաշխարհային թողարկումը»: Խոսելով ֆիլմի մասին՝ խումբն ասել է. «Սա ամենամեծ շրջագայությունն էր, որ մենք երբեւիցե արել էինք՝ մասշտաբի եւ կազմակերպման որակի առումով եւ դա հաստատապես այն շոուն է, որով մենք ամենից շատ հպարտանում ենք, այնպես որ, մենք չափազանց ոգեւորված ենք այն թողարկելու կապակցությամբ՝ որպես Ultra High Definition որակով առաջին համերգային տեսաֆիլմ: Դրանում անհավանական քանակությամբ մանրամասներ են երեւում եւ ոչ միայն այն, թե ինչ ենք անում մենք. երկրպագուները, նույնիսկ նրանք, ովքեր հետեւի շարքերում են, բեմը, դերասանները եւ հիանալի մթնոլորտը՝ Հռոմում այդ հատուկ երեկոյի ընթացքում: Մենք կարող ենք խոստանալ մեր երկրպագուներին, անկախ նրանից, արդյոք նրանք եղե՞լ են մեր համերգներին, թե՞ ոչ, որ դա կլինի բոլորովին նոր Muse-ի համերգի փորձ»: Ավելի վաղ, Billboard ամսագրի հետ հարցազրույցի ընթացքում, խոսելով խմբի գալիք նախագծերի մասին, Muse-ի առաջատար Մեթյու Բելամին ասել է, թե չնայած նրան, որ 2014-ին նրանք ընդամենը մի քանի փառատոների կմասնակցեն, սակայն երկրպագուները կարող են հանգիստ լինել, որ խումբը քրտնաջան աշխատելու է նոր նյութի վրա:
«Այս պահին ես մեծ քանակությամբ մշուշոտ գաղափարներ ունեմ, – կիսվել է Բելամին, – բայց շրջագայելու ընթացքում գրված ստեղծագործությունները միշտ միտում ունեն հնչելու այնպես, ինչպես այն երաժշտությունը, որով դու այդ պահին շրջագայում ես, այնպես որ, ես փորձում եմ սպասել, թե երբ մենք դրանից հեռու կլինենք: Հնարավոր է՝ մեկ կամ երկու հատուկ փառատոն կլինի: Միգուցե՝ մեկը Ամերիկայում եւ միայն մեկը՝ Եվրոպայում: Միտքն այն է, որ հաջորդ տարի նոր ձայնասկավառակով զբաղվենք»:
Համերգը, որ ներկայացված է տեսաֆիլմում, նկարահանվել է Muse-ի The 2nd Law World Tour շրջագայության ընթացքում՝ Հռոմի Օլիմպիական մարզադաշտում 2013թ. հուլիսի 6-ին՝ 60963 հանդիսականի առջեւ:
Հայկական ռոք ասոցիացիա
«Առավոտ» օրաթերթ
