Որքան էլ ԱԺ արտաքին հարաբերությունների մշտական հանձնաժողովի անդամները եւ ՀՀ ԱԳ փոխնախարար Շավարշ Քոչարյանը խնդրեցին Զարուհի Փոստանջյանին՝ հանել իր օրինագիծը՝ սպասելով ավելի հարմար պահի կամ որեւէ այլ ձեւով փորձել այնպես անել, որ իր ներկայացրած օրինագիծը՝ «Լեռնային Ղարաբաղի Հանրապետությունը ճանաչելու մասին» չդրվի քվեարկության, նա անդրդվելի էր:
Արդյունքում հանձնաժողովը երեք կողմ, երկու դեմ ձայների հարաբերակցությամբ բացասական եզրակացությամբ այս օրինագիծը կներկայացնի հաջորդ քառօրյա: Հետաքրքիր է, որ «դեմ» քվեարկողներից մեկը «Ժառանգություն» խմբակցության դե յուրե անդամ Ալեքսանդր Արզումանյանն էր, մյուսը՝ ՀՀԿ-ական Համլետ Հարությունյանը, որը ցուցադրական կերպով լքել էր նիստը, ասելով, որ չի մասնակցի Զարուհի Փոստանջյանի ներկայացրած հարցի քննարկմանը, բայց վերջում եկավ եւ «դեմ» քվեարկեց:
«Կողմ» քվեարկողներն էին Նիկոլ Փաշինյանը՝ ՀԱԿ-ից, Թեւան Պողոսյանը՝ «Ժառանգությունից» եւ Արմեն Ռուստամյանը՝ ՀՅԴ-ից:
Հանձնաժողովի նիստին ներկա մյուս անդամները՝ ՀՀԿ-ական Սամվել Ֆարմանյանը, Ռազմիկ Մարկոսյանը, Շիրակ Թորոսյանը, ՕԵԿ-ական Խաչիկ Հարությունյանը եւ անկախ պատգամավոր Էդմոն Մարուքյանը չմասնակցեցին քվեարկությանը: Առնվազն հինգ «կողմ» պետք է լիներ, որպեսզի օրինագիծը ստանար դրական եզրակացություն:
Կարդացեք նաև
Նիստից հետո տիկին Փոստանջյանը մեր հարցին, թե սպասո՞ւմ էր նման արդյունքի, ասաց, որ ավելի լավ էր տրամադրված, կարծում էր, որ վերջիվերջո, հանկարծ իրենց մեջ խիղճը կարթնանար, բայց, ցավոք սրտի, առայժմ «խիղճը սատանայի մոտ է, իրենց չի պատկանում»:
Տիկին Փոստանջյանը միանշանակորեն դեմ էր նիստի ընթացքում բազմիցս հնչած այն տեսակետներին, թե այժմ հարմար պահ չէ՝ ԼՂՀ-ն ճանաչելու համար. «Դուք ինքներդ լսեցիք, թե քանի անգամ ասացին, որ պետք է պահը որսալ, բայց նաեւ քանի անգամ էին ասում, որ եղել են պահեր, որ բաց են թողել, նրանք պահ որսացող չեն, եւ հերթական անգամ պահը բաց են թողնելու: Այսօր էլ են իրենք իրենց մասնակցությամբ պահը բաց թողնելու»:
Քննարկման մանրամասները՝ քիչ ավելի ուշ:
Մելանյա ԲԱՐՍԵՂՅԱՆ
