«Freedom House» իրավապաշտպան կազմակերպության ամենամյա զեկույցի համաձայն` համացանցի ազատության առումով ամենաազատ երկրների շարքում Հայաստանը`17-րդ հորիզոնականում է, Թուրքիան՝ 38-րդ, Ադրբեջանը` 39-րդ: Ռուսաստանը 41-րդն է, իսկ Իրանը 60-րդ տեղն է զբաղեցնում` եզրափակելով վարկանիշային աղյուսակը։
Aravot.am-ը Խոսքի ազատության պաշտպանության կոմիտեի նախագահ Աշոտ Մելիքյանից հետաքրքրվեց` համացանցի ազատության ցուցանիշն արդյոք բավարա՞ր է խոսելու մեզանում խոսքի ազատության առումով առաջընթացի մասին: Պարոն Մելիքյանը պատասխանեց. «Freedom House» -ի զեկույցները միշտ փաստարկված են: Այս պարագայում էլ համաձայն եմ զեկույցի հետ: Մեզանում առցանց ԶԼՄ-ները ավելի ազատ են, քան հեռարձակողները, քանի որ հեռարձակման ոլորտը տոտալ վերահսկման առարկա է իշխանության կողմից: 2002-ին, երբ փակվեց Ա1+ը՝ «Freedom House» -ի սանդղակով մենք հայտնվեցինք մամուլի ազատության տեսանկյունից անազատների շարքում: Համարում եմ, որ մեզանում մամուլը կիսաազատ է, ունենք անազատ հեռարձակման ոլորտ: Մամուլը կիսաազատ է, քանի որ այն բաժանված է տարբեր քաղաքական և տնտեսական ճամբարների: Համեմատաբար ազատ է առցանց ԶԼՄ-ների ոլորտը` չնայած այստեղ էլ են նկատվում որոշ փորձեր ազատության սահմանափակման ոլորտում»:
Մեր այն դիտարկմանը՝ արդյոք հակասություն չկա՞ այն բանում, որ մի կողմից ուսումնասիրությունները ցույց են տալիս, որ լրագրողների դեմ ճնշումներն աճել են, մյուս կողմից ՀՀ իշխանությունները հայտարարում են, թե խոսքի ազատության ոլորտում առաջընթաց է գրանցվում, պարոն Մելիքյանն այսպես արձագանքեց. «Որոշակի բարելավումներ կան: Ամեն դեպքում պակասել է ֆիզիկական բռնությունների թիվը: Ճնշումների քանակը ալիքաձև երևույթ է: Լինում են պիկեր և դեպքեր, երբ ճնշումների թիվը նվազում է: Բայց ամենևին էլ վիճակը բարվոք չէ: Թվերն ու փաստերը խոսում են այն մասին, որ խնդիրներ շատ կան:
Իշխանությունները միշտ էլ աշխատում են վիճակը բարվոք ցույց տալ, վարդագույն, բայց ամենևին էլ այդպես չէ, դրա համար էլ մենք հետևում ենք իրավիճակին և արձանագրում խախտումները»:
Կարդացեք նաև
Տաթև ՀԱՐՈՒԹՅՈՒՆՅԱՆ
