«Ազատություն» ռադիոկայան. Փարիզում սովորող 19-ամյա Խաչիկ Խաչատրյանը անցած շաբաթ օրն է արտաքսվել Հայաստան:
Փարիզում և Ֆրանսիայի այլ բնակավայրերում հազարավոր դպրոցականներ բողոքի ձայն են բարձրացրել հայազգի Խաչիկ Խաչատրյանին և գնչուհի Լեոնարդա Դիբրանիին երկրից արտաքսելու իշխանությունների որոշման դեմ:
Փարիզում սովորող 19-ամյա ուսանող Խաչիկ Խաչատրյանը անցած շաբաթ օրն է արտաքսվել Հայաստան, իսկ 15-ամյա Լեոնարդա Դիբրանին արտաքսվել է հոկտեմբերի 9-ին, հիմա նրա ընտանիքը բնակվում է Կոսովոյում:
France-Presse լրատվական գործակալությունը հաղորդում է, որ նրանց արտաքսելու դեմ հինգշաբթի օրը հազարավոր դպրոցականներ ու ուսանողներ էին դուրս եկել բողոքի ակցիաների, արգելափակել դպրոցների մուտքերը, համերաշխության կոչեր արել: «Հետ բերեք Խաչիկին ու Լեոնարդային, նրանք տեղացի են», – բացականչել են երթի դուրս եկած դպրոցականները՝ երգելով ու տանելով պաստառներ, պահանջելով Ֆրանսիայի ներքին գործերի նախարար Մանուել Վալսի հրաժարականը:
Ըստ կրթության ոլորտի տեղական պաշտոնյաների՝ Փարիզի շուրջ 20 դպրոցներում դասընթացները խաթարվել են, բողոքի ակցիաներ են անցկացվել:
Մայրաքաղաքից դուրս ևս բողոքի ակցիաներ են անցկացվել, մասնավորապես՝ Ֆրանսիայի հարավում, Մանդ քաղաքում շուրջ 100 դպրոցականներ ցույց են անցկացրել այսպիսի կարգախոսով՝ «Լեոնարդան դասարան չի գնում, մենք ևս հրաժարվում ենք դասարան մտել»:
Խիստ քննադատվում է Լեոնարդային բերման ենթարկելու գործողությունը, քննադատողները նշում են, որ անմարդկային վերաբերմունք է ցուցաբերվել․ հոկտեմբերի սկզբին դպրոցական էքսկուրսիայի ժամանակ նրան ուժով դուրս են բերել դասընկերներով լիքը ավտոբուսից, այնուհետև ծնողների և հինգ քույրերի ու եղբայրների հետ արտաքսել երկրից: Նրա ընտանիքը արդեն չորս տարի անօրինական բնակվում էր Ֆրանսիայում:
Ներքին գործերի նախարարը քննություն է սկսել, բայց միայն այն բանից հետո, երբ հարցը բարձրացրել են ոչ կառավարական կազմակերպությունները:
Ոստիկանության և ուսուցիչների պնդումներով՝ Լեոնարդային մյուս աշակերտների ներկայությամբ չեն բերման ենթարկել:
Դպրոցականներին արտաքսելը հարցեր է առաջացրել Ֆրանսիայի միգրացիոն քաղաքականության նկատմամբ, իշխող Սոցիալիստական կուսակցության ներսում ևս տարաձայնություններ է առաջացրել:
Ընդդիմադիր որոշ պատգամավորներ պաշտպանում են իշխանությունների գործողությունները՝ համարելով, որ եթե անօրինական բնակվողները չարտաքսվեն երկրից, ինչպես ուզում են դպրոցականները և որոշ քաղաքական գործիչներ, ապա դա վտանգավոր ուղերձ կլինի, դա կընկալվի, որ Ֆրանսիան ողջունում է անօրինական ներգաղթը: Բայց իշխող Սոցիալիստական կուսակցության անդամները խիստ քննադատել են կառավարությանը, մասնավորապես՝ ներքին գործերի նախարարին:
Ներքին գործերի նախարար Մանուել Վալսը ծնվել է Բարսելոնայում, նա Ֆրանսիա է տեղափոխվել 20 տարեկան հասակում:
Ֆրանսիայից արտաքսված դպրոցական Լեոնարդա Դիբրանին Կոսովոյի Միտրովիցե քաղաքից հարցազրույց է տվել մամուլին ու խնդրել, որ թույլատրեն վերադառնալ Ֆրանսիա և շարունակել ուսումը:
Հրաչ Մելքումյան
