Այսօր «Փաստարկ» ակումբում ՀՅԴ Հայ Դատի եւ քաղաքական հարցերի գրասենյակի ղեկավար Կիրո Մանոյանը խոսեց Բրյուսելում հոկտեմբերի 14-15-ին կայացած Եվրոպահայերի երրորդ համագումարի մասին:
Կիրո Մանոյանը տեղեկացրեց, որ Եվրոպահայության երրորդ համագումարը կարեւոր էր, որովհետեւ այնտեղ արծարծված հարցերը նաեւ օրակարգային են Հայաստանում: «Համագումարի երկու օրերին էլ մասնակցում էին Արամ Առաջինը, Հովիկ Աբրահամյանը, Բակո Սահակյանը, ինչպես նաեւ ամենայն հայոց կաթողիկոսի ներկայացուցիչը: Առաջին օրը քննարկվեց հայոց ցեղասպանության վերաբերյալ հարցը, խոսվեց այն մասին, որ արդեն պետք է անցնել հատուցման խնդիրներին: Տեսակետ հնչեց Եվրոպական միջավայրի համար առիթ ստեղծել հայ մտավորականներին համախմբվելու, թե ինչ տեսակ զրույց պետք է առաջ քաշեն Եվրոպայում: Քննարկվեց նաեւ Եվրոպայում հայ համայնքների իրավիճակը»,- տեղեկացրեց Կիրո Մանոյանը:
Ըստ նրա, փաստորեն երեսուն երկրներում ունենք հայ համայնքներ: Եվ այս առումով համագումարի ընթացքում կարեւորվեց այն, որ պետք է առանձին խորհրդաժողով անցկացվի Եվրոպայում հայ համայնքները զարգացնելու համար. «Քննարկվեց նաեւ թուրք-ադրբեջանական լոբբիստական կազմակերպությունների հարցը Եվրոպայում, շեշտվեցին, որ անհրաժեշտ է համագործակցություն` հայկական բոլոր կազմակերպությունների հետ: Հնչեցին առանձին զեկույցներ Սիրիայի հայության մասին, Ջավախքի խնդիրների եւ այլն»:
Կիրո Մանոյանը հավելեց, որ համագումարի հաջորդ օրը շարունակվեց Եվրոխորհրդարանում, որի հիմնական թեմաներից էր Հայոց ցեղասպանությունը, Արցախի հարցի կարգավորումը եւ այլն:
Կարդացեք նաև
Եվա ՀԱԿՈԲՅԱՆ
