«Զվարթնոց» օդանավակայանը կարող է և պետք է ծառայի որպես օդանավակայան: «Միջազգային օդանավակայաններ» կազմակերպությունը, որը օդանավակայանը ապամոնտաժելու հարց է բարձրացնում, նա հանդիսանում է անվարձահատույց վարձակալ օդանավակայանի՝ 30 տարով»,-«Նոյյան տապան» մամուլի ակումբում հայտարարեց օդանավակայանի հին մասնաշենքի նախագծի համահեղինակ Արթուր Թարխանյանի դուստրը՝ ճարտարապետ Անահիտ Թարխանյանը:
Անդրադառնալով այն պնդմանը, թե շենքը սեյսմակայունության տեսանկյունից վատ վիճակում է, տիկին Թարխանյանն ասաց. «Սեյսմիկայի հարցը չի համապատասխանում իրականությանը: Ժամանակին օդանավակայանը եղել է՝ որպես ռազմավարական օբյեկտ և նախագծվել է ինը պլյուս բալի երկրաշարժի համար»:
Անահիտ Թարխանյանը կառավարությանն առաջարկում է փոխել հիմնական վարձակալին, քանի որ այն չի ուզում պատասխանատվություն ստանձնել իրեն հանձնված շենքի նկատմամբ և ներդրումներ անել շենքը վերականգնելու համար:
Անահիտ Թարխանյանը մտահոգություն հայտնեց. «Օդանավակայանի շենքը քանդելը նշանակում է, որ ՀՀ-ն սեփական օդանավակայան չի ունենա, քանի որ այդ դեպքում պետական սեփականությունը կդառնա մասնավոր»:
Կարդացեք նաև
Հանրային խորհրդի Պատմական-ազգային արժեքների, հուշարձանների պահպանության, պատկանելության և օգտագործման խնդիրների ենթահանձնաժողովի նախագահ Ժասմին Ասրյանը այս մտադրությունը որակեց՝ որպես «վերջին ժամանակներում մեր հուշարձանների նկատմամբ ջարդ»:
Տիկին Ասրյանը «Զվարթնոցի» մասին ասաց. «Օդանավակայանը երկու անգամ ավելի ամուր է, քան Մոսկվայի Օստանկինո հեռուստաընկերության աշտարակը: Մեր հանրապետությունում ընդունված ձեռագիր է՝ սկզբից խոսել մի հարցի մասին, որը կամաց-կամաց պիտի իրագործվի, հետո արդեն փաստի առաջ կանգնեցնել և´ կառավարությանը, եւ´ հասարակությանը»:
Ժասմին Ասրյանը տեղեկացրեց, որ Հանրային խորհուրդը որոշել է անհապաղ կասեցնել որևէ ելք և մուտք օդանավակայանի այն տարածք, որը մտադիր է քանդել կառավարիչը և արգելանք դնել:
Անդրադառնալով սեյսմակայունության հարցին՝ տիկին Ասրյանն ասաց. «Եթե անգամ լիներ խնդիր, ապա այդ հարցը կարելի է շատ հեշտությամբ լուծել: Զվարթնոց օդանավակայանն այժմյան իրավիճակի դրությամբ ունի հարյուր միլիոն դոլարից ավելի արժեք»:
Հարցին իրավիճակը չի՞ վկայում այն մասին, որ կառավարության թողտվությամբ է դա կատարվում, Ժասմին Ասրյանը այսպես պատասխանեց. «Դանակը ոսկորին է հասել, այդ պատճառով էլ հասարակությունը կառավարությանը չի վստահում:Կառավարությունը ընդհանրապես թույլ չպիտի տար նման հարցի բարձրացումը»:
Տաթև ՀԱՐՈՒԹՅՈՒՆՅԱՆ
