Այսօր ՀՀԿ գործադիր մարմնի նիստում կադրային փոփոխությունների հարց չի քննարկվել: Նիստից հետո լրագրողներին ասաց ՀՀԿ խոսնակ Էդուարդ Շարմազանովը:
Նրա խոսքով, նիստում քննարկել են առաջիկա ՏԻՄ ընտրություններին եւ Արարատում քաղաքապետի ընտրությանը իրենց թեկնածուի մասնակցության հարցը:
Նա ասաց, որ դեռ հստակ չէ ՀՀ նախագահը Վիլնյուս կմեկնի՞, թե՝ ոչ. «Ժամանակը կգա, նախագահի մամլո ծառայությունը պաշտոնական պատասխան կտա: Առաջիկա հանդիպման մասին միայն կարող եմ ասել, որ գործող քաղաքական ուժի, Հայաստանի իշխանությունների համոզմամբ, պետք է շարունակենք երկխոսությունը մեր եվրոպացի գործընկերների հետ: Դա անհրաժեշտ է ե՛ւ Հայաստանին, ե՛ւ Եվրոպային, որովհետեւ բարեփոխումների արդյունքում Հայաստանը դարձել է ավելի ժողովրդավարական: Մեր երկխոսության մեխը պետք է լինի քաղաքական բարեփոխումների շարունակությունը՝ Հայաստանում խոսքի ազատության, մարդու իրավունքների, բազմակարծության եւ ժողովրդավարական բարեփոխումների շարունակությունը: Հիմա Վիլնյուսում դա կլինի հայտարարությո՞ւն, հռչակագի՞ր, ասոցացման համաձայնագի՞ր, քաղաքական մա՞ս, թե՞ նորացված տարբերակ, կարծում եմ, էական չէ: Էականն այն է, որ կողմերը պատրաստակամություն կունենան շարունակել երկխոսությունը»:
Պարոն Շարմազանովն ասաց նաեւ, որ Սերժ Սարգսյանը մեկնելու է Բրյուսել՝ մասնակցելու ԵԺԿ նախագահ Մարտենսի հուղարկավորությանը:
Կարդացեք նաև
Նա նաեւ անդրադարձավ Զորի Բալայանի աղմկահարույց նամակին. «Չեմ կարծում, որ պարոն Բալայանի նամակում զետեղված մտքերը մեկնաբանության կարիք ունեն, որովհետեւ իր տեսակետն է: Պարզապես, այնպիսի տպավորություն ունեմ, որ մեր հասարակության շատ ներկայացուցիչներ, որոնք մեկնաբանեցին, ուղղակի չէին կարդացել նամակն ամբողջությամբ: Այնտեղ կան հստակ կետեր՝ Արցախը ավելի մեծ է, քան ԼՂԻմ-ը, որը կամայականորեն գտնվել է բոլշեւիկյան իշխանության եւ Ստալինի կողմից: Արցախն ու Նախիջեւանը երբեք չեն եղել Ադրբեջանի կազմում: Ադրբեջանը արհեսատական պետական միավորում է, որի տարածքի մի մասը պատմական հայկական տարածք է, որը բնակեցված է եղել հայերով…»:
Արփինե ՍԻՄՈՆՅԱՆ
