«Այսօր մենք բավականին լուրջ խնդիրներ ունենք սրտի հիվանդությունների հետ կապված, քանի որ Հայաստանը առաջատար դիրք է գրավում սրտի հիվանդությունների քանակով»,-այդ մասին այսօր Aravot.am-ի հետ զրույցում տեղեկացրեց Էրեբունի բժշկական կենտրոնի գործադիր տնօրեն Արթուր Ռոստոմյանը` նկատելով, որ հանրապետությունում առավել տարածված է սրտամկանի ինֆարկտը:
«Սրտի հիվանդությունները կապված են սնվելու ոչ ճիշտ մշակույթի, ֆիզիկական ոչ ճիշտ ծանրաբեռնվածության, ծխելու, սթրեսների եւ այլնի հետ: Մենք նաեւ խնդիր ունենք հիվանդությունների կանխարգելման հետ կապված. հիվանդները դիմում են բժշկի այն ժամանակ, երբ արդեն բավականին լուրջ խնդիրներ են ունենում»,-ասաց Արթուր Ռոստոմյանը:
Նա եւ Էրեբունի բժշկական կենտրոնի սրտաբաններն այսօր եկել են Վանաձոր` սրտաբանության մեջ իրենց ունեցած փորձն ու գիտելիքը կիսելու լոռեցի բժիշկների հետ:
Կարդացեք նաև
«Առաջին տարին չէ, որ համագործակցում ենք Էրեբունի բժշկական կենտրոնի հետ: Այսօրվա գիտաժողովի նպատակը Լոռու մարզի առողջապահության համակարգին, հատկապես սրտաբաններին Էրեբունի բժշկական կենտրոնում սրտաբանության զարգացման համար ներդրված նորություններն ու առավելությունները ներկայացնելն է»,-իր խոսքում նշեց ՀՀ Լոռու մարզպետարանի աշխատակազմի առողջապահության եւ սոցիալական ապահովության վարչության պետ Սամվել Լամբարյանը:
Բացի գիտաժողովը` Երեւանից ժամանած սրտաբանները վաղն առավոտվանից Վանաձորի «Գուգարք» կենտրոնական պոլիկլինիկայում կկատարեն հիվանդների ընդունելություն:
Կենտրոնի առաջատար մասնագետները կիրականացնեն անվճար գործիքային և լաբորատոր հետազոտություն, ինչպես նաեւ խորհրդատվություն:
Անուշ ԲՈՒԼՂԱԴԱՐՅԱՆ
Քանի դեռ Հայաստանում լուրջ պայքար չի սկսվել ծխելու դեմ, այսպես էլ կմնա: Ուշքի եկեք!!!!