«Քարակերտ» քարաձուլման գործարանի տնօրեն, 1992-2000 թ-ին ՀՀ արդյունաբերության փոխնախարար Սուրեն Գևորգյանն այսօր «Ուրբաթ» ակումբում հրավիրված մամուլի ասուլիսի ընթացքում հայտարարեց, որ ոչ մետաղական հանքանյութերի մշակումը որպես ազգային արդյունաբերության առանցք պետք է դիտարկել, միաժամանակ շեշտելով, որ նախորդ երկու տասնամյակում մեր հասարակությանը մատուցվել են երկու իրարամերժ եւ կեղծ գաղափարներ. «Առաջինը, որ մենք ունակ ենք մեր հանքային ջրով «երկիր պահելու» , հետեւաբար զարգացած արդյունաբերության կարիքը չունենք, եւ երկրորդ պնդումն այն է, թե մեր երկիրն այնքան աղքատ է, որ կարող է գոյատեւել միայն իբրեւ հարուստ ու հզոր հովանավորի կցորդ»,-ընդգծեց Գեւորգյանը` նշելով, որ 2 պնդումներն էլ հավասարապես սին են եւ վտանգավոր:
Մասնագետի խոսքով, ոչ մետաղական հանքանյութերի եւ լեռնային ապարների ամենաորակյալ, ամենամեծ պաշարներն աշխարհում գտնվում են Հայաստանում:
Վերջինիս փոխանցմամբ` կառավարության կողմից ժամանակ առ ժամանակ գումարվող խորհրդակցությունները եւ դրանց ավարտին հնչող բարեմաղթանքները ազգային արդյունաբերության եւ մասնավորապես ոչ մետաղական նյութերի արտադրության զարգացման մասին, տարիներ շարունակ մնում են անպտուղ, մինչդեռ անհրաժեշտ է իրականացնել ազգային արդյունաբերության զարգացման նախագիծը, որի հիմքը հանդիսանում է տեղական հարուստ հումքանյութի վրա հիմնված, բնապահպանական խիստ պահանջներին համապատասխանող, բազմաթիվ աշխատատեղեր ստեղծող եւ լայն համաշխարհային պահանջարկ ունեցող արտադրություն:
Սուրեն Գևորգյանն ասաց, որ միայն Քարակերտի գործարանը կարող է 2000 աշխատատեղ ստեղծել։ «Ես զարգացման ծրագրեր ունեմ, որոնք կյանքի կոչվելու դեպքում կլինի այդ ամենը»,- ասաց նա` ընդգծելով. «Պետք է հասնել էներգախնայողության, Հայաստանն ունի այդ հնարավորությունը»:
Քրիստինա ՄԻՐԶՈՅԱՆ
