Այսօր «Հենարան» մամուլի ակումբում, լրագրողների հետ հանդիպման ժամանակ, «Համազգային վստահություն» հանրային խորհրդի նախագահ Աստղիկ Խաչատրյանն ու խորհրդի գիտական քարտուղար Ահարոն Ադիբեկյանը խոսեցին 2013 թվականի ՀՀ-ի լավագույն ապրանքների և հանրային ծառայությունների մասին:
Աստղիկ Խաչատրյանը տեղեկացրեց, որ «Համազգային վստահություն» խորհուրդը հոկտեմբերի 19-ին Մարզահամերգային համալիրում կազմակերպելու է «Տարվա լավագույն հանրային ծառայող և տարվա լավագույն ապրանքանիշ» ազգային մրցանակաբաշխությունը:
Խոսելով միջոցառման նպատակի մասին` նա ասաց. «Ասենք, որ մրցանակաբաշխությունն անցկացվում է արդեն երեք տարի` 2011 թվականից: Միջոցառման նպատակն է ներկայացնել և խրախուսել տնտեսության և հանրային ծառայության ոլորտներում լավագույնի կոչմանն արժանացած հանրային ծառայողներին ու կազմակերպություններին, որոնք տարվա ընթացքում աչքի են ընկել իրենց աշխատանքային ձեռքբերումներով, կորպորատիվ պատասխանատվությամբ` հանրության շրջանում արժանանալով բարձր գնահատականի»:
Ահարոն Ադիբեկյանն էլ ասաց, որ արժանիներին որոշելու համար հարցումներ են անցկացրել հանրապետության բնակչության և փորձագետների շրջանում: Մրցանակների կարժանանան շուրջ 35 ընկերություններ, որոնք լավագույնն են ճանաչվել տարբեր ոլորտներում:
Կարդացեք նաև
«Տարվա լավագույն հանրային ծառայող և տարվա լավագույն ապրանքանիշ» ազգային մրցանակաբաշխության գլխավոր գործընկերները «Սոցիոմետր» անկախ սոցիոլոգիական կենտրոնն է և Սպառողների միությունը:
Սիրանուշ ՀԱՅՐԱՊԵՏՅԱՆ
