Այսօր խորհրդարանական լսումներ էին կազմակերպվել էթիկայի եւ պատգամավորի վարքագծի կանոնների մասին:
Արդեն մշակվել են նախնական կանոններ Հայաստանի համար, եւ քննարկմանը հրավիրվել են փորձագետներ, որոնք ներկայացնում են միջազգային փորձը այդ հարցում:
ՀՅԴ պատգամավոր Արծվիկ Մինասյանը միջազգային փորձագետներից հետաքրքրվեց՝ «Քաղաքական մշակույթի հետ կապված կա՞ն վերլուծություններ, թե այս տարածաշրջանում ո՞ր վարքականոններն են, որ հնարավոր են եւ կիրառելի են: Միջազգային փորձում անկախ հետաքննություն իրականացնողը կամ ստանդարտների անկախ կոմիտեն ի՞նչ սկզբունքով է իր մեջ ներառում պառլամենտական ընդդիմադիր եւ ոչ ընդդիմադիր ուժերին: Դուք Ձեր զեկույցում ասացիք, որ սոցիալական վստահության մակարդակը շատ ցածր է Հայաստանում, չնայած նրան, որ վերջին երկու ընտրությունները վստահություն են ապահովել, Ձեր այդ հայտարարությունը ինչի՞ հիման վրա, ի՞նչ չափորոշիչ եք օգտագործել, որ ասում եք»:
Կանադայից հրավիրված խորհրդարանական էթիկայի գծով միջազգային փորձագետ Ռիկ Սթեյփնհերստը պատասխանեց. «Այն պետությունների թիվը, որտեղ կան պաշտոնապես այսպիսի կանոնագրքեր, շատ փոքր է: Անգամ ԵՄ ներսում կարծեմ 6-7 պետություններ ունեն պաշտոնապես հաստատված կանոնագրքեր: Բրիտանիայում, Ինդոնեզիայում մոտեցումները, էթիկայի մասին պատկերացումները շատ տարբեր են: Ինչ վերաբերում է ընտրությունների հետ կապված իմ հայտարարությանը, ես չեմ իմանում՝ ավելացե՞լ է վստահությունը, բայց ընտրությունների մասին ընդհանուր իմ կարդացվածությամբ, դրանք միջազգայնորեն ճանաչվել են, դրա հիման վրա ասում եմ, որ հանրային վստահությունը մեծացել է ընտրական գործընթացների նկատմամբ: Ես առաջին անգամ եմ գալիս Հայաստան եւ որեւէ իմաստով փորձագետ չեմ այդ առումով:
Կարդացեք նաև
ԲՀԿ խմբակցության քարտուղար Նաիրա Զոհրաբյանը հայտարարեց. «Այսօր այստեղ 131 պատգամավորներից ներկա է միայն 8-ը: Մեր երկրում ցանկացած օրենք չի գործելու, որովհետեւ կան օրենքից վեր կանգնած մարդիկ, ուստի իզուր ժամանակ ծախսել ներկա գտնվելու այս կարեւոր թեմայով քննարկմանը, նրանք նպատակահարմար չեն համարում»:
Փորձագետները օրինակներ էին բերել, թե ինչպես է պատգամավորը բիզնես կարգի տոմս վաճառել, մնացած գումարը դրել իր գրպանը: Նաիրա Զոհրաբյանի խոսքերով՝ «Եթե շատ անկեղծ լինենք, բացի այդ մեկ օրինակից՝ բիզնես կարգի տոմս վաճառել, մնացած գումարը դնել գրպանը, մնացած բոլոր կանոնները կարող են խախտվել մեր 131 պատգամավորների կողմից էլ»:
Հռիփսիմե ՋԵԲԵՋՅԱՆ
