Այսօր խորհրդարանական լսումներ էին հրավիրվել՝ «Խորհրդարանական էթիկա. Պատգամավորի վարքագծի կանոններ» թեմայով: Խորհրդարանական էթիկայի գծով միջազգային փորձագետ Ջոն Լյոնը քննարկման ընթացքում նշեց, որ շատ հարցեր կան, որոնք պետք է հաշվի առնել՝ պատգամավորին իր վարքի համար պատժելիս: Օրինակ, երբ պատգամավորը երեկոյան դրսում հարբած վիճակում ինչ-որ կռվի է մասնակցում, կամ այսպես ասած «դեբոշ» է սարքում, դա, ըստ փորձագետի, խայտառակում է իրեն, բայց ոչ խորհրդարանը: Ուստի նման արարքը չի կարող դառնալ խորհրդարանի կարգապահական վարույթի խնդիր:
Արդեն ՀՀ ԱԺ-ն մշակել է «Պատգամավորի վարքագծի կանոններ», որոնք դեռ պետք է քննարկվեն՝ նոր հաստատվեն: Այդ կանոններով նախատեսվում է, որ պատգամավորը պարտավոր է զսպված եւ հարգալից վերաբերմունք դրսեւորել քաղաքական ընդդիմախոսների, ԱԺ հարցերի քննարկման մասնակիցների, բոլոր այն անձանց նկատմամբ, ում հետ շփվում է ի պաշտոնե: Պատգամավորը պարտավոր է զերծ մնալ վիրավորական արտահայտություններ օգտագործելուց ինչպես մյուս պատգամավորների, այնպես էլ ԱԺ աշխատակազմի, ԶԼՄ ներկայացուցիչների նկատմամբ: Ուշագրավ է, որ այդ կանոններում նշվում է, որ պատգամավորները ԱԺ նիստերում այլ պատգամավորի հիշատակելիս պարտավոր է օգտագործել բացառապես «Հարգելի պարոն/տիկին….» դիմելաձեւը:
Պատգամավորը պարտավոր է հանդուրժողաբար վերաբերվել իր հանդեպ քննադատությանը, պարտավոր է օգտագործել իրեն հատկացված միջոցները եւ գույքը՝ բացառապես ծառայողական նպատակներով:
ԱԺ պատգամավոր Էդմոն Մարուքյանը հետաքրքրվեց՝ «կապ չկա՞ պատգամավորի սոցիալական կարգավիճակի եւ էթիկայի կանոնագրքի միջեւ: Ես ուսումնասիրել եմ, թե Բրիտանական պառլամենտի անդամը ինչ հնարավորություններ ունի՝ սկսած ծախսերի փոխհատուցումից մինչեւ ընտրատարածքների հետ կապված ցանկացած հարցի լուծում: Մենք կարո՞ղ ենք չապահովել առաջին մասը բարձրաստիճան պաշտոնյաների համար, երկրորդ մասը խստացնենք»:
Կարդացեք նաև
Ջոն Լյոնը պատասխանեց՝ պետք է երեք խնդիրներ լուծվեն՝ պատգամավորների աշխատավարձերի հարցը, քաղաքական կուսակցությունների ֆինանսավորման խնդիրը, ծախսերի փոխհատուցման համակարգը:
Հռիփսիմե ՋԵԲԵՋՅԱՆ
