«Սարսափելի նամակ է: Սարսափելի է, որ 21-րդ դարում կարելի է գովերգել բռնապետին եւ բռնապետությունը: Սարսափելի է, որ մենք կասկածի տակ ենք դնում պատմական ընթացքի մեջ մեր բեկումը, որը ձեռք ենք բերել: Չէ՞ որ բոլոր լավագույն պայմաններն այսօր կան, որպես մեկնարկ`ազատ, անկախ միացյալ մեր հայրենիքն ունենալու համար»,- այսօր «Տեսակետ» մամուլի ակումբում անդրադառնալով Զորի Բալայանի`ՌԴ նախագահին ուղղված նամակին, ասաց «Ժառանգություն» խմբակցության պատգամավոր Զարուհի Փոստանջյանը:
Նա Զորի Բալայանին ընդունում է, որպես հայ մարդ, բայց նրա արարքը, միեւնույն է, սարսափելի է համարում: Բայց իր աղջկա օրինակով հետեւելով այդ նամակին երիտասարդ սերնդի արձագանքին`ուրախ է, քանի որ նրանք չգիտեն, թե ի՞նչ է խորհրդային մարդը ու ինքն է թելադրելու ազատ, անկախ ու միացյալ Հայաստանի օրակարգը եւ ոչ թե Զորի Բալայանը:
Փոստանջյանը նաեւ տեղեկացրեց, որ վաղն ԱԺ արտաքին հարաբերությունների հանձնաժողովում կրկին քննարկվելու է «Ժառանգության» ներկայացրած օրինագիծը`Արցախի ճանաչման վերաբերյալ: «Մենք կարծում ենք, որ Հայաստանը պետք է ճանաչի Արցախի հանրապետությունը եւ երկու հայկական հանրապետություններով պետք է ստեղծենք մեր միությունը»,-ասաց նա:
Իսկ այս օրերին Մոսկվայում տեղի ունեցող իրադարձություններին տիկին Փոստանջյանն առայժմ չի ցանկանում գնահատականներ տալ, բայց կարծում է, որ դրանք սկսվել են դեռ երկու ամիս առաջ եւ կազմակերպված միջոցառումներ են:
Կարդացեք նաև
Նելլի ԳՐԻԳՈՐՅԱՆ
