Հոկտեմբերի 16-ը նշվում է որպես Հայ մամուլի օր:
1794 թ. հոկտեմբերի 16-ին է հրատարակվել հայկական առաջին տպագիր պարբերականը՝ «Ազդարարը»: Այն հիմնադրել է Հարություն քահանա Շմավոնյանը` Հնդկաստանի Մադրաս քաղաքում:
Եվ այսօր «Նոյյան Տապան» լրատվական կենտրոնում «Ազդարար»-ի համահայկական խմբագրությունն անցկացրեց «Հարություն Շմավոնյան» մրցանակի և օսկարների մրցանակաբաշխություն՝ ամենամյա հայկական մամուլի օրվա, ինչպես նաև «Ազդարար» ամսագրի հիմնադրման 219-ամյակի կապակցությամբ:
Ողջունելով և շնորհավորելով ներկաներին Մամուլի օրվա կապակցությամբ` «Ազդարար»-ի գլխավոր խմբագիր Մարտիկ Սարգսյանն ասաց. «1794 թվականի հոկտեմբերի 16-ին Հնդկաստանի Մադրաս քաղաքում Հարություն քահանա Շմավոնյանը Սուրբ Գրիգոր եկեղեցու բակում իր աղոթքն հղեց առ Աստված և ազդարարեց նոր հանդեսի` «Ազդարարի» ծնունդը: «Ազդարար»-ը, փաստորեն, հիմնադրեց հայ մամուլը, և ավելի հին է, քան այսօրվա շատ ազգեր և պետություններ: Սակայն պարբերականը շուտով ընդհատվեց (Հնդկաստանում խառը ժամանակներ էին), ընդամենը 18 համար լույս տեսավ: Սակայն 2007թ. վերջերին Գառնիկ Անանյանի հետ միասին վերահիմնադրեցինք հանդեսը Մադրասում: Այսօր արդեն «Ազդարարը» հրատարակվում է Հայաստանում»:
Կարդացեք նաև
Այնուհետև «Ազդարարի» պատասխանատու խմբագիր Շահանե Տեր-Առաքելյանը ներկայացրեց այս տարվա «Հարություն Շմավոնյան» մրցանակակիրներին, որոնք են`
- «Աշխարհի մարդիկ» գրքի հեղինակ Ստեփան Հեքիմյան
- «ՌԱԴոստ» լրագիր (հիմնադիր-խմբագիր` Վաչագան Բասենցյան)
- ԼՂՀ ՊՆ «Գոյամարտ» հեռուստածրագիր (հիմնադիր-ղեկավար` Սենոր Հասրաթյան)
- Ջավախքի ԱՏՎ-12 «Էվրիկա» հեռուստառադիոընկերություն (տնօրեն` Կարո Մելքոնյան)
- Լիբանանի «Ազդակ» օրաթերթի գլխավոր խմբագիր Շահան Գանտահարյան
- Թուրքիայի «Մարմարա» թերթի գլխավոր խմբագիր Ռոբեր Հատտեճեան
- Երևանի ճարտարապետության և շինարարության պետական համալսարանի տպագրության և լրատվության բաժին (ղեկավար` Ռուզաննա Հարությունյան)
- «Շանթ» ՀԸ հեռուստալրագրող Արտյոմ Երկանյան
- Իսպանացի գրող, հրապարակախոս, լրագրող Խոսե Անտոնիո Գուրիարան
- Բուլղարացի հեռուստալրագրող Ցվետանա Պասկալևա
- ՀՀ Սյունիքի մարզի Հարթաշեն գյուղի դպրոցի «Սյունաց բազե» աշակերտական թերթ (հիմնադիր-խմբագիր` Սամվել Լալազարյան)
- Հեռուստահաղորդավար Նվեր Մնացականյան
- Հեռուստալրագրող Պետրոս Ղազարյան:
Սիրանուշ ՀԱՅՐԱՊԵՏՅԱՆ
