Վերջին շրջանում շատ է խոսվում այն մասին, որ նոյեմբերին Վիլնյուսում ՀՀ-ի և ԵՄ-ի միջև ինչ-որ փաստաթուղթ կստորագրվի: Շրջանառության մեջ է դրվել այն տեղեկությունը, թե արդեն այն փաստաթուղթը, որը ստորագրվելու է, որոշակի է, այն մեկուկես էջանոց հռչակագիր է:
Aravot.am-ը «Ժառանգություն» կուսակցության փոխնախագահ Արմեն Մարտիրոսյանից հետաքրքրվեց` արդյոք կստորագրվի՞ նման փաստաթուղթ` հաշվի առնելով այն, որ կարծիք կա, թե դա շահավետ կլինի և՛ Եվրոպայի համար, որը 4 տարի այդ ուղղությամբ աշխատել է ՀՀ-ի հետ, և՛ Սերժ Սարգսյանի համար, որ ցույց տա, թե «և-և»-ի քաղաքականությունը գործեց: Պարոն Մարտիրոսյանը պատասխանեց. «Անգամ եթե նմանատիպ ինչ-որ փաստաթուղթ առկա լինի, ապա դա «և-և»-ի քաղաքականությունը չէ: Դրա համար մեր քաղաքացին պիտի զգա գնանկում, ներդրումների ուղղակի աճ, կառավարման համակարգի թափանցիկություն, հաշվետվողականություն, կոռուպցիայի նվազում, մենաշնորհային տնտեսության համակարգի վերացում»:
Անդրադառնալով գոյություն ունեցող փաստաթղթին` պարոն Մարտիրոսյանը նշեց. «Իսկ թղթի վրա ինչ-որ բան ստորագրելը չեմ համարում կարևոր, քանի որ նույնիսկ մինչև հիմա համագործակցությանը ոչինչ չապահովեց, ուր մնաց թե այդ խնդիրները հիմա լուծի: Սա հնարավոր է մի դեպքում միայն, եթե եվրոպացի մեր գործընկերները փորձեն դեմք փրկելու գործընթաց իրականացնել: 3.5 տարի բանակցել են և ամենավերջին փուլում ասում են` ոչ: Իրենց մեղքն էլ կա, հատկապես խորհրդարանական, նախագահական կեղծված ընտրություններին իրենց աջակցությունը ցույց տալու հանգամանքը»:
Մեր հստակեցմանը` այնուամենայնիվ, որևէ փաստաթուղթ Վիլնյուսում կստորագրվի՞, Արմեն Մարտիրոսյանն այսպես արձագանքեց. «Դա լինելու է հերթական իմիտացիոն գործընթացը`երկուստեք, որը եվրոպական որոշ չինովնիկների դեմքն է փրկելու, ՀՀ իշխանությունների հերթական մեկշաբաթյա PR-ն է լինելու, քանի որ այդ շաբաթից հետո մենք ունենալու ենք ձմեռ, որի պարագայում մեր քաղաքացին իր մաշկի վրա զգալու է և՛ գնաճը, և՛ մնացած գործընթացները: Ուստի չեմ կարծում, թե դա գլխավոր քաղաքական ինտրիգն է մեր դեպքում»:
Կարդացեք նաև
Տաթև ՀԱՐՈՒԹՅՈՒՆՅԱՆ
