Իջեւան քաղաքի բնակիչ, 1970թ. ծնված Արմենակ Հարությունյանին մեղադրանք է առաջադրվել այն բանի համար, որ նա 2012թ. ամռանը Իջեւան քաղաքի թիվ 3 միջնակարգ դպրոցի հարակից տարածքում աճած վայրի կանեփի թփերից ապօրինի հավաքել, պատրաստել եւ ավտոտնակում պահել է 1.34 գ հաստատուն քաշով չորացված «մարիխուանա» տեսակի թմրամիջոց:
Ըստ մեղադրական եզրակացության, 2012թ. մայիսին խնջույքի ժամանակ Ա. Հարությունյանը 2 կանանց՝ Ա. Ե.-ին եւ Ա. Մ.-ին հյուրասիրման նպատակով իրացրել է թմրամիջոց:
Ա. Հարությունյանին մեղադրանք է առաջադրվել ՀՀ քրեական օրենսգրքի 266 հոդվածի 1-ին մասով («Թմրամիջոցների, հոգեմետ նյութերի եւ դրանց պրեկուրսորների ապօրինի շրջանառությունն իրացնելու նպատակով կամ դրանց ապօրինի իրացնելը կամ պատրաստելը») եւ 268 հոդվածի 1-ին մասով («Թմրամիջոցների, հոգեմետ (հոգեներգործուն) նյութերի ապօրինի շրջանառությունն առանց իրացնելու նպատակի»):
Նախկինում չդատված Ա. Հարությունյանի նկատմամբ խափանման միջոց էր ընտրվել չհեռանալու մասին ստորագրությունը:
Կարդացեք նաև
Հոկտեմբերի 14-ին Տավուշի մարզի ընդհանուր իրավասության առաջին ատյանի դատարանի դատավոր Զոյա Զաքինյանը (նստավայրը՝ Բերդ) վճռել է Արմենակ Հարությունյանին մեղավոր ճանաչել Քրեական օրենսգրքի վերոհիշյալ 2 հոդվածներով եւ դատապարտել 3 տարի եւ 3 ամիս ժամկետով ազատազրկման:
Ոսկան ՍԱՐԳՍՅԱՆ
