«Անկախ նրանից՝ Հայաստանը կմիանա ի վերջո Մաքսային միությանը, թե ոչ, կարող ենք փաստել այն, որ այս որոշման արդյունքում Հայաստանի միջազգային վարկանիշը անկում ապրեց, ինչը ժամանակակից միջազգային հարաբերություններում խիստ վտանգավոր է` հատկապես մեր պարագայում, ի նկատի ունենալով ԼՂ հիմնախնդիրը, հայ-թուրքական չկարգավորված հարաբերությունները, անվտանգության ոլորտում մանեւրելու հնարավորության եւ հեռանկարի կորուստը եւ տնտեսությունը դիվերսիֆիկացնելու ռեսուրսի փոշիացումը: Նշված բոլոր վտանգները աչքի առաջ ունենալով՝ իշխանության այն գծուծ հիմնավորումները, թե անհնար է գտնվել մեկ անվտանգության համակարգում եւ միանալ այլ տնտեսական համակարգի, չեն դիմանում որեւէ քննադատության»,- «Առավոտի» հետ զրույցում անդրադառնալով սեպտեմբերի 3-ին Մոսկվայում ՀՀ եւ ՌԴ նախագահների համատեղ հայտարարությանը՝ ասաց «Եվրոպական ուսումնասիրությունների կենտրոնի» տնօրեն Արթուր Ղազինյանը: Մեր զրուցակցի համոզմամբ. «Սեպտեմբերի 3-ին ընտրությունը կատարվեց հօգուտ կարճաժամկետ եւ մշուշոտ ապագա ունեցող մի ուղղության` հրաժարվելով նշված երկարաժամկետ հնարավորություններից»:
«Առավոտ» օրաթերթ
