Կոտայքի մարզի ընդհանուր իրավասության դատարանի դատավճռի դեմ բողոք էր բերել Նարեգ Զարգարյանի ներկայացուցիչ, փաստաբան Երեմ Սարգսյանը:
Ինչպես տեղեկացրել էինք, Ալվինա Հարությունյանի նկատմամբ հարուցվել էր քրեական գործ: Նա մեղադրվել էր անցյալ տարվա հունվարի 27-ին Երեւան-Սեւան ճանապարհին իր վարած «Համմեր» մակնիշի ավտոմեքենայով Նարեգ Զարգարյանին վրաերթի ենթարկելու, նրա մահվան կապակցությամբ:
Ըստ գործով ձեռք բերված ապացույցների, Ալվինան նստելով Նարեգի մեքենան, փակել էր ավտոմեքենայի դռները, պատուհանները: Նարեգը «Համմեր» մեքենայի դրսի աջ կողնակից կախված է եղել: Նա ընկել էր մեքենայից, ստացած մարմնական վնասվածքներով տեղափոխվել էր «Աբովյան» բժշկական կենտրոն, որտեղ էլ գիտակցության չգալով մահացել էր:
Առաջին ատյանի դատարանը Ալվինա Հարությունյանին դատապարտել էր 3 տարվա ազատազրկման:
Կարդացեք նաև
Ըստ տուժողի իրավահաջորդի ներկայացուցիչ, ՀՀ փաստաբանների պալատի անդամ Երեմ Սարգսյանի, Ալվինա Հարությունյանի արարքում ակնհայտորեն առկա էր նաեւ ՀՀ քրեական օրենսգրքի 183-րդ հոդվածով նախատեսված հանցագործության հանցակազմը՝ ավտոտրանսպորտային այլ միջոցին ապօրինաբար տիրանալը՝ փախցնելը, առանց հափշտակման նպատակի:
Ե.Սարգսյանը միջնորդություն էր արել որակման հետ կապված, այն մերժվել էր դատախազի կողմից, ապա հետեւել էր մեղադրանքը պաշտպանող դատախազին բացարկ հայտնելը:
Ըստ փաստաբանի վերաքննիչ բողոքի էլ, Ալվինա Հարությունյանի կողմից Նարեգին ուղղակի դիտավորությամբ սպանելու, նրա ավտոմեքենան նրա կամքին հակառակ փախցնելու հանգամանքները անհերքելիորեն հաստատված են հենց քրեական գործում առկա ապացույցների համակցությամբ:Մասնավորապես, փաստաբանը հայտնել էր, որ Նարեգը կառչել է ավտոմեքենայից,գոռոցներով պահանջել է, որպեսզի ղեկին հայտնված Ալվինան կանգնեցնի իր ավտոմեքենան:
Ի դեպ, Ալվինան ղեկին եղել է ալկոհոլային խմածությամբ, եւ մեքենան վարել է 100-120 կմ/ժ. արագությամբ, այն էլ 2 կմ տարածության վրա:
Վերաքննիչ դատարանը կարճեց այս գործը, եւ համաներում կիրառեց Ալվինա Հարությունյանի նկատմամբ:
Ռուզան ՄԻՆԱՍՅԱՆ
