Երեկ ՀՀ կրթության եւ գիտության նախարար, ՀՀԿ խորհրդի անդամ Արմեն Աշոտյանից փորձեցինք մեկնաբանություն ստանալ ՀՀ սպորտի եւ երիտասարդության հարցերով նախարարի տեղակալ, ՀՀԿ-ական Խաչիկ Ասրյանի՝ Զարուհի Փոստանջյանին խարույկի վրա այրելու կոչի վերաբերյալ։
– Ինչո՞ւ Խաչիկ Ասրյանը ոչ կառավարական, ոչ էլ կուսակցական որեւէ պատժի չի ենթարկվում։
– Հարցազրույց չեմ տալիս, հարգելի Հայկ։
– Ես հարցազրույց չեմ ուզում, միայն մեկ հարց եմ տալիս։
Կարդացեք նաև
– Ես չեմ պատասխանում ձեր ոչ մի հարցի այս պահին։
– Իսկ կառավարությունում շատ կա՞ն մարդիկ, որոնք հակումներ ունեն
մարդկանց խարույկների վրա այրելու։
– Ես չեմ կիսում հարցադրում տալու ձեր այսօրվա մտահղացումը։
Քիչ անց նա անսպասելիորեն սկսեց կիսել «հարցադրում տալու» մեր «այսօրվա մտահղացումը»։ Մոտենալով հարցրեց՝ ձայնագրիչը միացվա՞ծ է։ Դրական պատասխան ստանալուն պես խոսեց այսպես. «Բնականաբար ես միշտ չէ, որ կիսում եմ իմ կուսակից ընկերների տարբեր կարծիքներ, մանավանդ, եթե նրանք հետագայում մեկնաբանել են, լրացուցիչ ճշգրտել են։ Իմ մեկնաբանության կարիքը չկա։ Բայց սին են այն բոլոր փորձերը, որ ընդդիմադիր լրատվական դաշտի որոշ ներկայացուցիչներ փորձում են գործադրել, որպեսզի Զարուհի Փոստանջյանից ստանան մեր օրերի Ժաննա Դ՚Արկ։ Ոչ մի չափանիշով նման կերպարի մեջ մտնելու հնարավորությունը տիկին Փոստանջյանը չունի։ Վերջ։»,– ասաց պարոն Աշոտյանը ու հեռացավ։ «Պարոն Աշոտյան, բայց ստացվեց, որ դուք կիսում եք Ասրյանի կարծիքը, որ մարդկանց պետք է այրել խարույկի վրա…»,- փորձեցինք շարունակել զրույցը, բայց Աշոտյանը կրկին սկսեց չկիսել «հարցադրում տալու» մեր «այսօրվա մտահղացումը»:
Հ. Գ.
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
