«Իրավիճակը փոխվել է, բայց վերջին տարիների գործունեության արդյունքները չեն կարող հերքվել: Շատ բան է ձեռք բերվել»,- այսօր «Արեւելյան գործընկերության չորս տարիները` արդյունքներ եւ մարտահրավերներ: Հայաստանի քաղաքական գործիչների եւ փորձագետների տեսակետները» թեմայով քննարկման ժամանակ իր խոսքում նկատեց Հայաստանի հանրապետությունում Չեխիայի հանրապետության գործերի ժամանակավոր հավատարմատար Պետեր Միկիսկան:
Քննարկումը կազմակերպվել էր Երեւանում Չեխիայի հանրապետության դեսպանատան եւ «Գլոբալիզացիայի եւ տարածաշրջանային համագործակցության վերլուծական կենտրոն» հասարակական կազմակերպության ջանքերով:
Այս խորհրդաժողովի գաղափարը մի քանի ամիս առաջ էր հղացել: Այն ժամանակ, սակայն, շեշտադրումներն այլ էին:
«Որոշ քաղաքական գործիչներ որոշ երկրներում դրանք հերքում են, բայց դրանք այն գործիչներն են, ովքեր ցանկանում են Հայաստանն ավտորիտար տեսնել: Մենք զգում ենք, որ հայերը ազատ ժողովրդավար, բարեկեցիկ տարածքին միանալու ցանկություն ունեն, այդ տարածքը կոչվում է ԵՄ»,- ասաց պարոն Միկիսկան`նկատի ունենալով ռուսաստանցի պաշտոնյաների կողմից`ընդդեմ ԵՄ-ի վերջին շրջանում արվող հայտարարությունները`հավելելով. «Ողջունում ենք Հայաստանի կառավարության ցանկությունը`ԵՄ-ի հետ հարաբերությունները խորացնելու վերաբերյալ, ինչի մասին սեպտեմբերի երեքից հետո քանիցս է հայտարարվել»:
Նելլի ԳՐԻԳՈՐՅԱՆ
