Մի շարք ազատամարտիկներ և հ/կ-ների ներկայացուցիչներ այսօր հանդես են եկել հայտարարությամբ` տեղեկացնելով, որ վաղը ժամը 11-ին` Թամանյանի արձանի մոտից մեկնարկելու է երթը մինչեւ կառավարության շենքի մոտ, որի ժամանակ պահանջելու են գենդերային օրենքի փոփոխություն եւ ՀՀ աշխատանքի և սոցիալական հարցերի փոխնախարարներ Լալա Ղազարյանի ու Ֆիլարետ Բերիկյանի հրաժարականները:
Երթի կազմակերպիչները պնդում են, որ «գենդեր» բառը օրենքից դուրս բերելը, ինչին կառավարությունը գնաց, բնավ էլ չի փոխում օրենքի էությունը, իսկ իրենց պայքարը բառերի դեմ չէ, այլ բովանդակության, ինչը կարող է ուղիղ անդրադառնալ նաեւ մեր կյանքի վրա»:
Aravot.am-ը ՀՀ աշխատանքի և սոցիալական հարցերի փոխնախարար Ֆիլարետ Բերիկյանից հետաքրքրվեց` հիմնավոր համարո՞ւմ է ազատամարտիկների մտահոգությունը և իր հրաժարականը պահանջելը: Նա պատասխանեց. «Չգիտեմ` ինչ են ասել մարդիկ, որ գնահատական տամ: Ես մամուլի ասուլիս արել ու ասել եմ իմ կարծիքը ու դեռ ավելացնելու բան չունեմ»:
Իսկ իր հրաժարականի պահանջի մասին ասաց հետևյալը. «Նախագահի հրաժարականն են պահանջում, իմը ի՞նչ է, որ չպահանջեն: Մարդկանց մոտ ինֆորմացիայի պակաս, իրազեկվածության խնդիր կա: Կաշխատենք իրազեկել, որ թյուրիմացությունների մեջ չընկնեն: Դա կանենք կլոր սեղան-քննարկումների, մամուլի ասուլիսների, հանդիպումների միջոցով»:
Կարդացեք նաև
Տաթև ՀԱՐՈՒԹՅՈՒՆՅԱՆ
