Հայաստանը տարիներ առաջ ընդունել է մի շարք միջազգային կոնվենցիաներ, սակայն դրանցից, օրինակ՝ Օրհուսի կոնվենցիայի պահանջները չի կատարում: Այսօր «Արմատ» ակումբում Օրհուսի կոնվենցիայի պահանջները չկատարելու վերաբերյալ Էկոլոգիական դաշինքի համակարգող, բնապահպան Սիլվա Ադամյանն ասաց, որ մեզ մոտ ուղղակի հնարավորություն չկա այդ պահանջները կատարելու:
Ասուլիսի մեկ այլ մասնակից՝ «Դալմա-Սոնա» կազմակերպության ղեկավար Ռուզաննա Ղազարյանն էլ նշեց, որ այդ պահանջներից մեկն էլ հանրային նշանակության որոշումների քննարկմանը հանրությանը մասնակից դարձնելն է: Տիկին Ղազարյանի ներկայացմամբ` դեռեւս 2001-ին Հայաստանը միացել է Օրհուսի կոնվենցիային, իսկ մինչ այդ Էսպոյի կոնվենցիայով ՀՀ-ն պարտավորվում էր ընդունել ընթացակարգ՝ շրջակա միջավայրի ազդեցության գնահատման մեթոդիկան ու չափանիշները, ապա համապատասխան օրենքում էլ ներառել վնասակարության չափորոշիչները, ինչը չի արվել:
Տիկին Ղազարյանը Օրհուսի կոնվենցիայի՝ որպես խախտման օրինակ բերեց Դալմայի այգիները, որն իրացվեց առանց հանրությանը նախապես տեղյակ պահելու: Aravot.am-ի այն հարցին, թե որեւէ պատասխանատվություն ՀՀ կառավարությունը կրո՞ւմ է, եթե չի կատարում կամ խախտում է Օրհուսի կոնվենցիան, ասուլիսի մասնակիցներն ասացին, որ միջազգային այս կոնվենցիան ընդամենը բարոյականության վրա է հիմնված, այսինքն՝ կառավարությունների բարոյականությունից ելնելով է կատարվում կամ խախտվում միջազգային այս փաստաթղթի պահանջները. «Որեւէ պատասխանատվություն չի նախատեսվում, հո Հայաստանին բանտ չե՞ն նստեցնելու: Խնդիրն այն է, որ պետությունը գիտակցի, որ պետք է արվի, հանրությունն էլ պետք է այնքան իրավագիտակից լինի, որ պահանջի կառավարությունից»:
Մանրամասն` տեսանյութում
Կարդացեք նաև
Ռուզաննա Ղազարյանի խոսքերով` ներկայումս ԱԺ-ում է շրջակա միջավայրի մասին օրենքի նախագիծը, որը բնապահպանության նախարարությունն է մշակել: Այս նախագծում, ինչպես վստահեցրեց տիկին Ղազարյանը, ներառված չեն այն կարեւոր դրույթները, որը հենց Օրհուսի կոնվենցիան է պահանջում, մինչդեռ իշխանությունը միջազգային կազմակերպություններին ներկայացնում է, որ պահանջները կոնվենցիայի ներառված են:
Տիկին Ղազարյանի խոսքերով` օրենքի նախագծում, շրջակա միջավայրի վրա ազդեցությունը պարզելու համար հետազոտություն պետք է արվի, միջազգային կոնվենցիաները պահանջում են գիտական հետազոտություն, իսկ մեր օրենքի նախագծում գիտական բառը հանված է:
«Եվրոպայի աչքին դեմոկրատ երեւալու համար են ընդունել միջազգային կոնվենցիաները»,- նման կարծիք հայտնեց Սիլվա Ադամյանը:
Aravot.am-ի այն հարցին գուցե միջազգային կառույցներն անտարբեր են Հայաստանում բնապահպանական խնդիրների եւ միջազգային կոնվենցիաների խախտումների նկատմամբ, քանի որ հանքարդյունաբերության մեջ շատ են եվրոպական ներդրումները, տիկին Ադամյանը չբացառեց այս հանգամանքը: Բնապահպանի պատասխանի մանրամասները` տեսանյութում:
Նելլի ԲԱԲԱՅԱՆ
