«Շանհայ» քառյակը համարվում է աշխարհի առաջնային կամերային համույթներից մեկը: Այն աշխարհի ամենալիդեր քառյակն է: Սա էտալոնային մակարդակ է եւ երջանիկ եմ, որ այսօր իրենք Հայաստանում են»,-այսօր այս մասին Երեւան հյուրանոցի «Պուչչինի» սրահում ասաց «Երեւանյան Հեռանկարներ» միջազգային երաժշտական փառատոնի հիմնադիր նախագահ, կոմպոզիտոր Ստեփան Ռոստոմյանը:
Երաժիշտներն այսօր են ժամանել Հայաստան: Քսաներկու ժամ լինելով ճանապարհին հասցրել էին մի լավ հոգնել:
Ջութակահար Վեյգանգ Լիի փոխանցմամբ` նախորդ անգամ, երբ եղել են Հայաստանում, մնացել են ընդամենը քսանվեց ժամ: «Եկանք, նվագեցինք եւ հաջորդ առավոտ մեկնեցինք ԱՄՆ: Այս անգամ էլ երկար ժամանակով չենք ժամանել Հայաստան, բայց հույս ունենք, որ այս անգամ կհասցնենք տեսնել Երեւանը, քանի որ նախորդ անգամ գիշերով էինք եկել եւ մայրաքաղաք Երեւանը տեսնել չէինք կարողացել»,-ասաց ջութակահարը:
Քառյակն առաջին անգամ Հայաստանում ելույթ է ունեցել 2009-ին` «Հայաստանում Քշիշտոֆ Պենդերեցկու օրերի» շրջանակում:
Կարդացեք նաև
Խմբի մեկ այլ ջութակահար Յի-Վեն Յանգը Հայաստանի մասին առաջին անգամ լսել էր հորից: Վերջինիս փոխանցմամբ` խումբը գործում է շուրջ 30 տարի. «Տասնչորս տարի է, ինչ նույն կազմով ենք, սակայն մինչ այդ եղել են փոփոխություններ»:
«Շանհայ» քառյակի համերգը տեղի կունենա հոկտեմբերի 15-ին Արամ Խաչատրյան համերգասրահում` «Երևանյան Հեռանկարներ» միջազգային երաժշտական փառատոնի շրջանակներում, այնուհետեւ խումբը կմեկնի Պեկին համերգների, այնտեղից էլ Ավստրալիա:
Քրիստինա ՄԻՐԶՈՅԱՆ
