Այսօր ՀՀ վերաքննիչ քրեական դատարանում քննվում էր ազատամարտիկ, քաղբանտարկյալ, պահեստի գնդապետ Վոլոդյա Ավետիսյանի գործը: Դատարանի շենքի մոտ հավաքված բազմությունը, որոնց մեծամասնությունը ազատամարտիկներ էին, եւ եկել էին Հայաստանի տարբեր մարզերից, հույս ունեին, որ այսօր, վերջապես, արդարություն կհաստատվի եւ իրենց մարտական ընկեր Վոլոդյա Ավետիսյանն ազատ կարձակվի: Դատական նիստը դռնփակ էր, որից դուրս գալուց հետո Վոլոդյա Ավետիսյանի պաշտպան Արա Զաքարյանը հայտնեց, որ այսօրվա դատական նիստում դատավորը լսել է մեղադրող կողմին, ապա որոշել քննությունը հետաձգել, որպեսզի վաղը նաեւ բացատրություններ տալու համար ներկա գտնվի քննիչը:
Արա Զաքարյանի փոխանցմամբ`դատարանի որոշումը օրենքին դեմ է եւ կամայական․ «Դեռեւս նախորդ նիստի ժամանակ առաջին ատյանի դատարանը որոշեց, որ քննիչի բացակայությամբ հնարավոր է գործի քննությունը շարունակել, իսկ այսօր հայտարարում է, թե քննիչը պետք է ներկա լինի: Իմ կարծիքով` դատարանի այսօրվա որոշման պատճառը գործի ձգձգումն է»:
Արա Զաքարյանը նաեւ շեշտեց, որ դատարանը պարտավոր էր հենց այսօր որոշում կայացնել, քանի որ Վոլոդյա Ավետիսյանին առաջադրված մեղադրանքն իրավունք չունի քննելու ՊՆ քննչական ծառայությունը` «Առ այսօր Վոլոդյա Ավետիսյանի գործով ոչ մի քննություն ու առերեսում չի արվել»,- հավելեց Արա Զաքարյանը:
Համաներումը կազդի արդյո՞ք Վոլոդյա Ավետիսյանի վրա թե, ոչ հարցին պատասխանելով էլ Արա Զաքարյանն ասաց, հոդվածը, որով Վոլոդյա Ավետիսյանին մեղադրանք է առաջադրվել, համաներում նախատեսող հոդվածներից է․ «Վոլոդյան ինքն էլ չի առարկում, որ իրեն համաներմամբ ազատ արձակեն: Եթե մեր վերաքննիչ դատարանն իրոք իր դերում լինի, պետք է Վոլոդյա Ավետիսյանին ազատ արձակի, սակայն դա դեռ չի նշանակում, որ Վոլոդյա Ավետիսյանն ընդունում է իր դեմ առաջ քաշված մեղադրանքը»,-Ավելացրեց Արա Զաքարյանը:
Կարդացեք նաև
Եվա ՀԱԿՈԲՅԱՆ
