«Փաստաբանության» և «Պետական տուրքի մասին» օրենքներում առաջարկվող փոփոխությունների և լրացումների վերաբերյալ ՀՀ կառավարության նախաձեռնությունը մտահոգությունների տեղիք է տվել նաեւ Լոռու մարզում գրանցված 48 փաստաբաններին:
Այսօր նրանք հանդես են եկել հայտարարությամբ`քննադատելով ՀՀ կառավարության նախաձեռնությունը`այն համարելով անխոհեմ եւ անհեռանկար:
Նախագծի համաձայն՝ փաստաբանների պետական գրանցամատյանում մեկ տարի ժամկետով հաշվառվելու համար փաստաբանից գանձվելու է տարեկան 60 հազար դրամ պետական տուրք կամ ամիսը 5000 դրամ:
Լոռիում աշխատող փաստաբանները կարծում են, որ այդ քայլը ոտնձգում է ՀՀ-ում փաստաբանության անկախությանը և մեծ հարված է հասցնելու պետության հեղինակությանն ընդհանրապես:
Կարդացեք նաև
«Այդ օրենքներում կառավարության ներկայացրած փոփոխությունների փաթեթը բացարձակ չպատճառաբանված, անհիմն է: Մատյան վարելու համար պետական տուրք են ուզում սահմանել, այնինչ ՀՀ փաստաբանների պալատը առանց այդ էլ անվճար վարում է այդ մատյանը, ինչ կարիք կա ամսական 5000 դրամ վճարել»,-Aravot.am-ի հետ զրույցում ասում է ՀՀ փաստաբանների պալատի անդամ, փաստաբան Ռուբեն Հակոբյանը:
Այս հարցին ՀՀ կառավարությունն իր բացատրությունն ունի:
Համաձայն դրա` գոյացած գումարները ուղղվելու են Հանրային պաշտպանի գրասենյակին:
Այս բացատրությունը, սակայն, չի գոհացնում փաստաբանական համայնքին, քանի որ Հանրային պաշտպանի գրասենյակն առանց այդ էլ ՀՀ Սահմանադրությամբ պարտավորված է պետական բյուջեի հաշվին անվճար ծառայություն մատուցել անապահովներին։
«Ստացվում է` պետությունը ցանկանում է իր բեռը փաստաբանների ուսերին բարձել»,-ասում են փաստաբանները:
Բացի այդ` նրանք նկատում են, որ հավելյալ վճարումները ֆինանսական խնդիրներ կառաջացնեն փաստաբանների շրջանում:
«Բավական շատ փաստաբաններ կան, որոնց նկատմամբ փաստաբանական վարույթներ են հարուցվում անգամ անդամավճարները` ամսական 5000 դրամները չվճարելու հիմքով, չեն կարողանում վճարել այդ գումարը»,-ասում է փաստաբան Ռուբեն Հակոբյանը` մանրամասնելով, որ այս դեպքում պետական տուրքի համար 5000 դրամ վճարելը չհիմնավորված, չպատճառաբանված մոտեցում է:
Փաստաբանները մտահոգություն են հայտնում նաեւ այն մասին, որ պետական տուրքը չվճարելու դեպքում կզրկվեն արտոնագրից:
«Կարծում եմ` պետությունը այս քայլով զրկում է փաստաբանական համայնքին իր ունեցած անկախությունից եւ ինքնուրույնությունից, որը, մեղմ ասած, ճիշտ չէ: Ես կողմ եմ փաստաբանների պալատի նախագահ Արա Զոհրաբյանի այն առաջարկին, որ եթե չվճարելու եւ այդ մատյաններում չգրանցվելու համար մեզ պետք է զրկեն փաստաբանի արտոնագրից, ապա պետությունը չի ունենա փաստաբան»,-եզրափակում է փաստաբան Ռուբեն Հակոբյանը` տեղեկացնելով, որ Լոռու մարզի փաստաբանները ՀՀ փաստաբանների պալատի կողքին են եւ միասնական պայքարելու են արդյունքի հասնելու համար:
Անուշ ԲՈՒԼՂԱԴԱՐՅԱՆ
