«Հաղթում է կամքը»,- այսօր դատարանի դահլիճից ազատ արձակվելուց հետո լրագրողների հետ զրույցում ասաց ՀԱԿ ակտիվիստ Տիգրան Առաքելյանը:
Նրան մի հարց էր հետաքրքրում. «Ես այսքան ժուռնալիստ երբեք իմ դատերին չեմ տեսել, ի՞նչ է պատահել, ի՞նչ է կատարվել, որ այսքան հետաքրքրություն կա»:
Տիգրան Առաքելյանին դատարանի դահլիճից կոնգրեսականներն ուղեկցում էին հերոսի նման, նրան մաղթում «չարչարանքիդ ապաշխարանք»: Իսկ նրա ազատության համար պայքարած ՀԱԿ խմբակցության ղեկավար Լեւոն Զուրաբյանին մեծարում. «Ապրես, մեռնեմ ջիգյարիդ, ժողովրդի դեպուտատը ըտենց ա լինում, ա՛յ: Ժողովրդի դեպուտատը դու ես»:
Հարցին՝ ի՞նչ քայլեր ես պատրաստվում անել առաջիկայում՝ Տիգրան Առաքելյանը պատասխանեց. «Առայժմ քայլում եմ դեպի առաջ, հետոն կտեսնենք»:
Կարդացեք նաև
Տիգրան Առաքելյանը վստահեցրեց, որ երբեք իրեն այս 2 տարվա ընթացքում անազատ չի զգացել. «Գաղափարապես ես եղել եմ նույն ազատության մեջ: Ընդամենը փոխվել է կարգավիճակը»: Նա վստահեցրեց, որ մեղադրանքն ի սկզբանե եղել է ապօրինի:
Իր ազատության համար նա շնորհակալություն հայտնեց հասարակությանը, որը ճնշում գործադրեց իշխանությունների վրա:
Լրագրողների հարցին՝ դատարանի հետ կապված՝ Տիգրան Առաքելյանը չհամաձայնեց. «Դատարան մի ասեք: Եթե ուզում եք պետություն կառուցեք, երբեք թույլ մի տվեք դատարանի խորհրդակցական սենյակը կից կառուցվի Բաղրամյան 26-ին՝ նախագահական նստավայրին: Դա ամենասխալ ճարտարապետությունն է՝ պետություն կառուցելու գործում»:
Հռիփսիմե ՋԵԲԵՋՅԱՆ
