Րոպեներ անց ՀՀ վերաքննիչ քրեական դատարանում քննվելու է ազատամարտիկ, քաղբանտարկյալ, պահեստի գնդապետ Վոլոդյա Ավետիսյանի գործը: Դատարանի շենքի մոտ հավաքված են Վոլոդյա Ավետիսյանի մարտական ընկերները, հարազատները եւ բոլոր նրանք, ովքեր սատարում են ազատամարտիկին:
Տեղեկացանք, որ դատական նիստը կայանալու է դռնփակ, սակայն հավաքված ազատամարտիկները դեռ հույս ունեն, որ կարող են ներս մտնել:
Aravot.am-ի հետ զրույցում ազատամարտիկներն ասացին, թե բերդից տեղեկություն են ստացել, որ այսօր իրենց ընկերոջը` Վոլոդյա Ավետիսյանին ազատ կարձակեն. «Բերդի տվյալները հավաստի են, այնտեղ ավելի շուտ են իմանում տենց բաները…»,- նշեցին նրանք, ավելացնելով, որ իրականում հիմնավոր պատճառ չկար ազատամարտիկին ձերբակալելու, դատապարտելու համար:
Ազատամարտիկների խոսքով` «բռնաբարության հոդվածով չկարողացան նստեցնել, սպանության, գողության հոդվածով չկարողացան, մնացել էր էդ հոդվածը, դա սարքեցին»:
Կարդացեք նաև
Վոլոդյա Ավետիսյանին սատարողները տարբեր կոչեր են հնչեցնում՝ ի պաշտպանություն Վոլոդյա Ավետիսյանի, նրանք պահանջում են արդարություն հաստատել, եւ ազատամարտիկին ազատ արձակել, հակառակ դեպքում՝ կապացուցվի, որ այս երկրում ամեն ինչ շինծու է:
Եվա ՀԱԿՈԲՅԱՆ
