«Պահեստային սպաներ» ադրբեջանական հասարակական միավորման ռազմական փորձագետ Յաշար Ջաֆարլին դիմել է երկրի գլխավոր դատախազ Զաքիր Գարալովին և Ազգային անվտանգության նախարար Էլդար Մահմուդովին՝ կապված պաշտպանության նախարար Սաֆար Աբիևի բանկային հաշիվների տեղեկատվության հետ: Դիմումը հրապարակվել է ադրբեջանական իշխանամետ «Բիզիմ յոլ» պարբերականում: Հայտնում է «Հաքքին» լրատվականը:
Իր դիմումում Ջաֆարլին նշում է, որ հունգարական «OTR BANK»-ը սառեցրել է Աբիևի բանկային հաշիվները, որի վրա 65 միլիոն եվրո կար: Բանկը Աբիևից այդ գումարների վերաբերյալ տեղեկատվություն է պահանջել, սակայն նախարարը չի կարողացել եկամտի մասին ներկայացնել համապատասխան հայտարարագիր:
«Ինտերպոլի հունգարական մասնաճյուղի հաշվետվությունում ասվում է, որ երկու ամսվա ընթացքում Ադրբեջանից կասկածելի փոխանցումներ են եղել հունգարական հինգ հաշիվների վրա: Այդ փոխանցումներից ստացված գումարը կազմել է 686 000, 196 000, 617 000 և 252 000 դոլար: Բացի այդ, ըստ բանկային փոխանցումների տեղեկատվության, նախարար Սաֆար Աբիևը ամսական երեք միլիոն դոլար է ստանում: Եվ սա միայն Հունգարիայում բացահայտված հինգ հաշիվների թվերն են», – ասվում է դիմումում:
Ջաֆարլին նշել է, որ իրենք շարունակելու են ուսումնասիրել Սաֆար Աբիևի՝ Գերմանիայի, Իսպանիայի, Շվեյցարիայի և այլ երկրներում ունեցած բանկային հաշիվները:
Կարդացեք նաև
Ադրբեջանի ՊՆ մամուլի խոսնակ Էլդար Սավիրօղլուն իր հերթին հայտնել է, որ անհրաժեշտ չի համարում մեկնաբանել մի մարդու զառանցանքները, որը տարբեր ուժերի ձեռքին խաղալիք է դարձել:
Պատրաստեց Հովհաննես ԻՇԽԱՆՅԱՆԸ
