Նիստում մարզի կենսական հարցերն էին
Հոկտեմբերի 12-ին Տավուշի մարզպետարանի նիստերի դահլիճում կայացավ մարզխորհրդի նիստ: Հողի հարկի եւ գույքահարկի բազաների ճշգրտման ընթացքի, 2013 թվականի աշնան գյուղատնտեսական աշխատանքների, օրենքով սահմանված ֆինանսական համահարթեցման լրավճարների եւ բնակչության պետական ռեգիստրի ելակետային տվյալների , համայնքային տեղեկատվական համակարգի ներդրման եւ շահագործման աշխատանքների մասին եղան զեկույցներ, կայացան քննարկումներ, ներկայացվեց Տավուշի մարզի զբոսաշրջային քարտեզը, եղան հայտարարություններ:
Տավուշի մարզխորհրդի նիստին ներկա էին մարզպետարանի տեղեկատվության եւ հասարակայնության հետ կապերի բաժնի 2 աշխատակից եւ «Առավոտի» թղթակիցը:
Մարզխորհրդի նիստի եւ դրա օրակարգի վերաբերյալ հայտարարությունը տեղադրված է մարզպետարանի ինտերնետային կայքում, սակայն մարզի լրագրողները նիստին ներկա չէին:
Կարդացեք նաև
Ներկա չէր նաեւ մարզպետ Արմեն Ղուլարյանին փաստացի պատկանող (փաստաթղթերով հիմնական սեփականատերը մարզպետի բարեկամն է) մարզային «Տավուշ» հեռուստաընկերության նկարահանող խումբը:
Կառավարության որոշմամբ Տավուշի մարզի սահմանամերձ համայնքների հողի հարկի վճարման նպատակով պետությունն այդ գումարը վճարում է, համայնքները մեկամսյա ժամկետում գումարները, հողամասերի տերերի տվյալները պետք է մուտքագրեն համայնքների տեղեկատվական համակարգ:
Նիստում նշվեց, որ գումարը մայիսի 31-ին է փոխանցվել, սակայն սահմանամերձ 22 համայնքներից միայն 3-ն է կատարել այդ մուտքագրումը:
Մարզպետ Ա. Ղուլարյանը հայտարարեց, որ եթե այդ համայնքները մինչեւ նոյեմբերի կեսը չավարտեն մուտքագրման գործընթացը, նշված գումարները հետ են վերադառնալու պետական բյուջե:
«Ինֆորմացիան այս նիստի «Տավուշ» ստուդիային կհաղորդեք, թող բոլոր համայնքների անունները հրապարակվեն»,-ասաց մարզպետ Ղուլարյանը :
Ոսկան ՍԱՐԳՍՅԱՆ
