«Ազատություն» ռադիոկայան. Իլհամ Ալիևի անհապաղ հրաժարականի պահանջը շաբաթ օրը Բաքվում ադրբեջանական ընդդիմության կազմակերպած առաջին հետընտրական հանրահավաքի գլխավոր կարգախոսն էր:
Հարկ է նկատել, որ սա վերջին շրջանում ընդդիմության նախաձեռնած թերևս ամենաբազմամարդ ու տպավորիչ բողոքի գործողությունն էր:
Դիմելով մասնակիցներին՝ «Մուսավաթ» կուսակցության առաջնորդ Իսա Ղամբարն արձանագրում էր․ – «Փոխվում են ժամանակներն ու դարաշրջանները, իսկ Ալիևների վարչակազմի մեթոդները անփոփոխ են»:
«2003 թվականին Իլհամը գողացավ իմ հաղթանակը, ժողովրդի տարած հաղթանակը: Այսօր նա նույն կերպ վարվեց Ջամիլ Հասանլիի հետ: Բայց ինչի հասավ Իլհամն այս 10 տարվա ընթացքում` միլիարդների կարողություն դիզեց` փոխարենն արժանանալով ժողովրդի ատելությանը», – նշում էր Ղամբարը:
Կարդացեք նաև
Հոկտեմբերի 9-ի նախագահական ընտրություններում ընդդիմադիր Ժողովրդավարական ուժերի ազգային խորհուրդը ներկայացնող Ջամիլ Հասանլիի համոզմամբ էլ՝ այն, ինչ կատարվեց, քվեարկության արդյունքների համատարած խեղաթյուրում էր:
«Հոկտեմբերի 9-ից հետո Ադրբեջանն անդառնալիորեն փոխվել է: Թեև իշխանությունները հերթական անգամ կեղծեցին ընտրությունները, այնուհանդերձ, հասարակությունն է փոխվել: Իրականում հոկտեմբերի 9-ին քվեարկությանը մասնակցել է ընտրողների ընդամենը 20 տոկոսը: Նրանց 65-70 տոկոսը քվեարկել է ընդդիմության թեկնածուի օգտին: 2500 տեղամասերից ստացված մեր փաստական տվյալները վկայում են, որ այս քրեական, կոռումպացված թալանչիական ռեժիմը համատած կերպով կեղծել է ընտրությունները», – նշում էր Հասանլին:
Ընտրությունների բողոքարկման օրինական գրեթե բոլոր ուղիներից, սակայն, ադրբեջանական ընդդիմությունն արդեն իսկ զրկվել է: Կենտրոնական ընտրական հանձնաժողովի երեկ կայացած նիստի ժամանակ զուտ տեխնիկական պատճառաբանություններով մերժվեց ընդդիմադիրների ներկայացրած բողոքի քննությունը:
Ուշագրավ է, որ ԿԸՀ-ում Ջամիլ Հասանլիի լիազոր ներկայացուցչին հնարավորություն չտվեցին մասնակցել երեկվա նիստին․ ոստիկանությունը նրան ձերբակալեց և հինգ ժամ ներքին գործերի բաժնում պահեց հենց այն ժամանակ, երբ նա գնում էր մասնակցելու ընտրական հանձնաժողովի նիստին:
Ադրբեջանական ընդդիմության վերջին հույսը Արևմուտքի արձագանքն է: Սա է պատճառը, որ մի քանի ժամից Ջամիլ Հասանլին կմեկնի սկզբում Բրյուսել, ապա՝ Ստրասբուրգ, որտեղ եվրոպական կառույցների ներկայացուցիչների հետ կքննարկի Ադրբեջանում ստեղծված հետընտրական կացությունը:
Գեւորգ Ստամբոլցյան
