Ռուսաստանի հայերի միության եւ Համաշխարհային հայկական կոնգրեսի նախագահ Արա Աբրահամյանը մի քանի օր է, ինչ Հայաստանում է եւ մրցանակներ է հանձնում տարբեր ոլորտների ստեղծագործողներին: Այսօր ՀՀ ԳԱԱ նախագահության նիստերի դահլիճ նրա գլխավորությամբ անցկացվեց ՀՀԿ Երիտասարդական կազմակերպությունների ասոցիացիայի հերթական համագումարը:
Համագումարի ընթացքում երիտասարդական կազմակերպությունների ղեկավարները պատրաստակամություն հայտնեցին ջանք ու եռանդ չխնայել եւ նույն ոգով աշխատել՝ միեւնույն ժամանակ ստանալով իրենց հուզող հարցերի պատասխանները:
Արա Աբրահամյանն էլ իր հերթին առաջարկեց մշակել հստակ գործողությունների եռամյա ծրագիրը, որը նպատակ կունենա ստեղծել միասնական երիտասարդական շարժում, հիմնադրամ, որ կհոգա երիտասարդության որոշ կարիքներ, ինչպես նաև՝ առաջիկա 3 տարիները հայտարարել երիտասարդության տարի: Երբ ծրագրերը պատրաստ լինեն, Արա Աբրահամյանը խոստացավ փոխանցել հանրապետության ղեկավարին իրենց գործողությունների ծրագիրը, իսկ մինչև այդ աջակցել ֆինանսավորման հարցում: «Մենք պետություն չենք, որտեղ կարող է բյուջե կուտակվել: Մենք միայն ծախսող ենք եւ պետք է մեր ունեցածը շատ խնայողաբար օգտագործենք»,-ասաց նա: Երիտասարդներն էլ իրենց հերթին առաջարկների պակաս չունեին: Նրանք ցանկություն ունեն մասնակցելու Երիտասարդության մասին օրենքի մշակմանը, ինչպես նաև՝ խնդրեցին հնարավորության դեպքում հանդիպել նախագահ Սերժ Սարգսյանի հետ:
Ի պատասխան երիտասարդների ցանկությանը՝ Արա Աբրահամյանն ասաց, որ 182 երկրների նախագահներից չկա մի նախագահ, ով 10 օրվա ընթացքում իրեն չընդունի, սակայն, անգամ հանրապետության նախագահի հետ հանդիպելուց եւ հարցեր քննարկելուց առաջ պետք է նախ պատրաստված լինել: Առաջարկեց երիտասարդներին մշակել մեխանիզմները, իր աջակցությամբ որոշակի արդյունքին հասնել եւ առաջացող խնդիրների դեպքում հանդիպել եւ հստակեցնել: Երիտասարդական կառույցը կազմակերպություններ ունի աշխարհի 20 երկրներում, այժմ դրանց թիվը ընդլայնվելու է, միաժամանակ ստեղծվելու են տարածաշրջանային գրասենյակներ, որպեսզի գործողությունները ավելի համակարգված լինեն: Երիտասարդական կառույցը ընտրեց նոր նախագահ: Արա Աբրահամյանի պատգամը երիտասարդ հայերին մեկն է` լինել միասնական, շատ աշխատել ու չհիասթափվել: Այս բանաձևով ոչինչ անհնար չի լինի: «Ես չգիտեմ մի հայ, ով իր հայրենիքը չսիրի: Փայլուն երիտասարդներ ունենք: Այսօր մենք շարժման կարիք ունենք, մեզ միացնողի կարիքը ունենք»:
Կարդացեք նաև
Քրիստինա ՄԻՐԶՈՅԱՆ
