«Իհարկե, դա լավագույն միջոցը չէ, բայց այս պահի դրությամբ սուբսիդավորումը հարցի լուծման միակ ուղին է: Սակայն մյուս կողմից յուրաքանչյուր քաղաք իր իսկ ճանապարհով է գնում, բայց կրկնում եմ, այս պահին սուբսիդավորումն անխուսափելի է»,-խոսելով տրանսպորտի ուղեվարձի թանկացման խնդիրների լուծման մասին՝ այսպիսի կարծիք հայտնեց Թբիլիսիի քաղաքապետ Գեորգի Ուգուլավան:
Ռիգայի քաղաքային խորհրդի նախագահ Նիլ Ուշակովը, ով Ռիգայի տրանսպորտը աշխարհում «ամենալավերից» համարեց, նշեց. «Այս հարցը մի կողմից հեշտ է, մյուս կողմից` դժվար: Խնդիրն այն է, թե ով է վճարում դոտացիայի համար: Մեզ մոտ դոտացիայի 95 տոկոսը վճարում է քաղաքը, ավելի փոքր տոկոս վճարում է Ռիգայի կառավարությունը: Մեզ մոտ դոտացիայի ցուցանիշը կազմում է 900 միլիոն եվրո»: Նիլ Ուշակովը նշեց, որ իրենց համար հասարակական տրանսպորտը սոցիալական գործիք է ու մանրամասնեց. «Ռիգայում թոշակառուները, ավարտական դասարանների աշակերտները, հաշմանդամները անվճար են օգտվում հասարակական տրանսպորտից: Այդ քաղաքական որոշումը կայացվել է չորս տարի առաջ: Մեզ համար իրավիճակը ճգնաժամային է այն պատճառով, որ մեզ մոտ ամեն ինչ վճարում է քաղաքը»:
Հարցին` քաղաքապետի պաշտոնը քաղաքակա՞ն պաշտոն է, թե նախընտրելի է, որ այն լինի վարչատնտեսական, Նիլ Ուշակովը պատասխանեց. «Դա ցանկալի չէ, բայց միևնույն ժամանակ անխուսափելի է, և դա պետք է ընդունել որպես փաստ»:
Տաթև ՀԱՐՈՒԹՅՈՒՆՅԱՆ
