ՀՀ առողջապահության նախարար Դերենիկ Դումանյանն այսօր ընդունեց Կոլումբիայի համալսարանի պրոֆեսոր Ջոն Բիլեզիկյանին և Լոս Անջելեսի Երևանի պետական բժշկական համալսարանի շրջանավարտների ասոցիացիայի մի խումբ անդամների։
«Ուրախ եմ, որ շարունակում եք Ձեր ծրագրերը Հայաստանում` ուշադրության կենտրոնում պահելով կանանց առողջության խնդիրները»,-ողջունելով հյուրերին, ասաց նախարարը։
ԱՄՆ-ից ժամանած մասնագետները Դերենիկ Դումանյանի հետ քննարկեցին թե՛ հերթական այցի շրջանակներում նախատեսվող միջոցառումները, թե՛ նախանշվող հետագա ծրագրերը Հայրենիքում։
Ամերիկահայ բժիշկները ելույթներ կունենան Օստեոպորոզին նվիրված 7-րդ միջազգային գիտաժողովում և իրենց փորձը կհաղորդեն մեր մասնագետներին։ Կկազմակերպեն կանանց առողջությանը նվիրված կլոր սեղան, առողջության քայլարշավ, և մի շարք այլ միջոցառումներ։ ԵՊԲՀ-ի շրջանավարտների ասոցիացիայի ղեկավար Մարիամ Մանուկյանը կարևորեց «Առողջ ապագա» ակցիան, որի շրջանակներում ԱՄՆ-ից ժամանած մասնագետները հոկտեմբերի 13-ին Երևանի պետական բժշկական համալսարանի մեծ դահլիճի ճեմասրահում 50 տարեկանից բարձր 1000 և ավելի մարդկանց շրջանում անվճար հետազոտություններ և խորհրդատվություններ կիրականացնեն դիաբետի, բարձր զարկերակային ճնշման, օստեոպորոզի և այլ հիվանդությունների ախտորոշման ուղղությամբ։
«Մենք ևս չափազանց կարևորում ենք ոչ վարակիչ հիվանդությունների կանխարգելումն ու վաղ հայտնաբերումը։ Այդ ուղղությամբ 2014 թվականին մեծ ծրագրեր են նախատեսվել։ Համաշխարհային բանկի դրամաշնորհով ամենից տարածված և ամենաբարձր մահացություն բերող երեք հիվանդությունների` սրտանոթային, դիաբետիկ և արգանդի պարանոցի քաղցկեղի վաղ հայտնաբերման ուղղությամբ մեծածավալ` ազգաբնակչության 50 տոկոս ընդգրկվածությամբ, սկրինինգ ծրագրեր կիրականացվեն։ Այժմ նախապատրաստական փուլում ենք` թիրախային խմբերը և առաջնային օղակի բուժհիմնարկների գործիքային ապահովվածությունն է ճշտվում և այլ աշխատանքներ են տարվում, որպեսզի միջոցները հնարավորինս արդյունավետ ծախսվեն»,-ասաց նախարար Դումանյանը։
Որոշվեց «Առողջ ապագա» ակցիայի արդյունքները քննարկել նախարարության սկրինինգային ծրագիրը նախապատրաստող խմբի հետ։
Ջոն Բիլեզիկյանն իր գոհունակությունը հայտնեց այն առթիվ, որ իրենց կողմից Հայաստան բերված ոսկրի խտությունը որոշող 6 սարքը (դենսիտոմետր) հաջողությամբ կիրառվում են թե՛ Հայաստանում, թե՛ Լեռնային Ղարաբաղում։ Նաև տեղեկացրեց, որ անհարժեշտության դեպքում առաջիկայում ևս կարող են Հայաստանի համար նման սարքեր ձեռք բերել։ Քննարկվեցին հետագա համագործակցությունն առավել համակարգված և արդյունավետ դարձնելու հարցեր։
Նախարար Դումանյանն իր հյուրերին նաև ներկայացրեց ոլորտում իրականացվող բարեփոխումներն ու առաջիկա ծրագրերը։
ՀՀ առողջապահության նախարարություն
