Իտալացի թավջութակահարը համերգ եւ վարպետաց դասեր է ունեցել
Վերջին շրջանում մշակութային տարբեր ոլորտներում մեզանում անցկացվող միջազգային, հատկապես երաժշտական փառատոների շնորհիվ Երեւանը անվանի արվեստագետների պակաս չի զգում: Մարզերի պարագայում պատկերը տխուր է:
Սեպտեմբերի 11-ին մեկնարկած Երեւանյան 7-րդ միջազգային երաժշտական փառատոնը, հավատարիմ մնալով իր որդեգրած քաղաքականությանը, այս տարի էլ սիմֆոնիկ եւ կամերային երաժշտության համերգաշարում, որոնց հաճախ անդրադարձել է «Առավոտը», ներկայացրել է «թանկարժեք» երաժիշտների, այդ թվում՝ ջութակահարներ Իզաբել Ֆաուստին (Գերմանիա), Բորիս Բրովցինին (Մեծ Բրիտանիա), թավջութակահար Նարեկ Հախնազարյանին (Ռուսաստան), Մատան Պոռատին (Իսրայել), դաշնակահար Կիրիլ Գերշեյնին (ԱՄՆ) եւ մյուսներին, այդուհանդերձ, մասնագետները, հատկապես երաժշտագետներն առանձնացրին հիշյալ փառատոնի շրջանակում իտալացի թավջութակահար Մարիո Բրունելոյին:
«Առավոտի» հետ զրույցում Լոնդոնի, Ֆիլադելֆիայի, Ճապոնիայի եւ այլ ճանաչված նվագախմբերի, ինչպես նաեւ դիրիժորներ Կլադուի Աբբադոյի, Վալերի Գերգիեւի, Ռիկարդո Մուտիի, Յուրի Տեմերկանովի եւ այլոց հետ հանդես եկած թավջութակահար Մարիո Բրունելոն առանձնակի ջերմությամբ խոսեց Հայաստանի պետական ֆիլհարմոնիկ նվագախմբի (ՀՊՖՆ) եւ նրա գլխավոր դիրիժոր Էդուարդ Թոփչյանի մասին:
Թավջութակահարը կարեւորեց մասնավորապես կամերային երաժշտության ասպարեզում ծավալած իր գործունեությունը՝ հայտնելով անվանի երաժիշտներ Գիդոն Կրեմերի, Յուրի Բաշմետի, Մաուրիցիո Պոլինիի, Բորոդինի եւ Ալբան Բերգի կվարտետների եւ այլ երաժիշտների հետ իր համագործակցության մասին:
Մարիո Բրունելոն հիշատակեց նաեւ ճանաչված ջութակահար Անուշ Նիկողոսյանի անունը, առանց մանրամասնելու էլ ասաց, որ, իր խոսքերով՝ տաղանդավոր հայ երաժշտի հետ առաջիկայում ծրագրեր ունի:
Հարցին՝ չի՞ կարծում, որ դասական արվեստում վաղուց կայացող շոուներից բացի, անհրաժեշտ է ինչ-որ նոր մտահղացում եւս կյանքի կոչել՝ եղած երաժշտասերներին պահելու եւ նորերին ներգրավելու համար, մեր զրուցակիցը տեղեկացրեց, որ ինքը նման նախագծեր է իրականացնում եւ հանդիսատեսի հետ կապերի ընդլայնման ճանապարհը տեսնում է խոսքի, երաժշտության, գեղարվեստական կերպարների համատեղման մեջ:
Թավջութակահարի հետ զրույցին միացած ՀՊՖՆ-ի կոներցտմայստեր Կարմեն Թոսունյանը Մարիո Բրունելոյի նվագը որակելով «երկնային», շտապեց տեղեկացնել, որ դեկտեմբերին սպասվում է նաեւ հայաստանցի ունկնդրին արդեն ծանոթ, մեկ այլ անվանի թավջութակահար Սթիվեն Իսերլիսի համերգը: Կոնցերտմայստերը նշեց, որ Մարիո Բրունելոն անցկացրել է նաեւ վարպետության դասընթաց. «Մեր նվագախմբի հետ նրա մեկնաբանմամբ հազվադեպ կատարվող Մյասկովսկու կոնցերտը պարզապես կարող եմ համարել գլուխգործոց, իսկ նման երաժիշտների կողմից Երեւանում անցկացվող վարպետության դասընթացները, նաեւ մեզ՝ ֆիլհարմոնիկի արտիստներիս համար էլ են կարեւոր»: Կարմեն Թոսունյանը հավելեց, որ փառատոնը կշարունակվի մինչեւ հոկտեմբերի 25-ը:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
