Այսօր Քրեական վերաքննիչ դատարանում Տիգրան Առաքելյանի դատին պաշտպան Ստեփան Ոսկանյանն իր պաշտպանական ճառում վստահեցրեց, որ մեղադրանքը շինծու է: Նա կոչ արեց դադարեցնել Տիգրան Առաքելյանի, Դավիթ Քիրամիջյանի, Սարգիս Գեւորգյանի, Արտակ Կարապետյանի նկատմամբ քրեական հետապնդումը՝ հանցակազմ չլինելու պատճառաբանությամբ:
Տիգրան Առաքելյանն իր պաշտպանական ճառում հայտարարեց. «Ես չեմ կարծում, որ իմ ճառից է կախված այս դատավճիռը: Դատաքննության ընթացքում բազմիցս բարձրաձայնել եմ այդ մասին»:
Նա նշեց, որ միգուցե եղել են պահեր, երբ իրավիճակը դուրս է եկել հունից: Բայց դա եղել է համարժեք՝ անհիմն իրեն կալանավայրում պահելու պատճառով:
Ըստ Տիգրան Առաքելյանի, եթե տուժող Տիգրան Ավետիսյանի կոտրված քիթը կրկնակի փորձաքննության ենթարկվեր, ամեն ինչ պարզ կլիներ, որ նրա քիթը չի կոտրվել. «Լսել եմ, որ նա ինչ-որ նարկոտիկների համար նստած է: Չգիտեմ, բայց դատարանը նրա քիթը չտեսավ էլ: Ինձ ծանր մեղադրանք են առաջադրում նրա քթի համար, երբ չկա ռենտգենի ժապավենը: Դատարանը մեր այդ միջնորդությունը մերժելով՝ լուրջ կասկած հարուցեց, որ այս դատարանը միգուցե չուզեց մյուս դատարաններին անհարմար վիճակի մեջ դներ, որովհետեւ կբացահայտվեր ամեն ինչ: Սա՝ քթի մասով: Անդրադառնամ Ալիկ Սարգսյանին»:
Կարդացեք նաև
Ըստ Տիգրան Առաքելյանի, երբ դատարանը մերժեց նրան դատարանի դահլիճ հրավիրելու իրենց միջնորդությունը, լուրջ բացթողում կատարեց. «Դա իմ մեղքը չի, որ վկան գալիս է, ասում է՝ չեմ հիշում: Դատաքննությունը էնքան եք երկարացրել…Ոնց հասկանում եմ՝ էս գործը մենակ հիշում են դատախազն ու դատարանը, ուրիշ ոչ մեկը չի հիշում: Եթե սա է դատը, եթե այսպիսի դատավարական պրոցեսից հետո պետք վճիռ լինի, ես սա չեմ համարում դատավարական պրոցես: Մենք խոսում ենք արդարադատության մասին, հասարակության մեջ արդարադատության վստահությունը բարձրացնելու մասին: Հասարակությունը պնդում է, որ մարդասպանը պետք է բանտում նստի՝ հայտնի դեպքով: Բայց նույն հասարակությունը, 27 ԶԼՄ-ներ պահանջում են, որ կալանքից ինձ ազատեն, ստորագրում են, որ ես քաղբանտարկյալ եմ, բայց դատարանը չի լսում հասարակությանը: Ես նույնիսկ վարչական իրավախախտում չեմ արել, բայց գտնվում եմ կալանքի տակ: Գոնե մի դրվագ, որն ապացուցված եք համարում, ներկայացրեք: Ես երկար կխոսեի, բայց ինձ թվում է՝ բոլորին պարզ է ինչ է կատարվում: Մենք բոլորս ՀՀ քաղաքացիներ ենք, ոչ ոք չգիտի, թե ով վաղը ինչով կզբաղվի: Ես կուզեմ այս գործի հանգուցալուծման մասին ժպիտով պատասխանեմ: Ես ուզում եմ արդարություն լինի: Ազատության մեջ հայտնվելով՝ արդարություն չեմ գտնի»:
Նա նշեց, որ դատախազին չի էլ ուզում անդրադառնա, նրա անունն անգամ չի ուզում տա:
Տիգրան Առաքելյանի ճառից հետո հնչեցին բուռն ծափողջույններ՝ «Սուպեր ելույթ էր, Տիգրան»:
Հռիփսիմե ՋԵԲԵՋՅԱՆ
