Քիչ առաջ սկսվեց Տիգրան Առաքելյանի գործով դատավարությունը Վերաքննիչ քրեական դատարանում: Դատարանն անցել է վիճաբանությունների փուլին: Այս պահին իրենց ճառերն են ներկայացնում ամբաստանյալները:
Արտակ Կարապետյանը հրաժարվեց ճառից՝ հայտարարելով, որ բոլորին է հայտնի այս գործի քաղաքական դրդապատճառները, եւ նույնիսկ դատախազը չկարողացավ հորինել մի այնպիսի պատմություն, որը ապացուցվեր:
Սարգիս Գեւորգյանի խոսքերով՝ չնայած ամբողջ հասարակությունը միանգամայն հասկացել է, որ այս գործն ունի քաղաքական դրդապատճառներ՝ այս քրգործով դատավճիռ իրականացնելը որեւէ հիմք չունի: Ըստ նրա, դատարանների եւ ոստիկանության ապօրինի եւ հանցավոր գործունեությունն է սա ապացուցում: Նրանք ՀՀԿ-ի, իշխանության շահերի սպասարկման գործիք են:
Նա անդրադարձավ նաեւ գործում առկա խախտումներին, որոնք հնարավորություն կտան դատարանին ճիշտ վճիռ կայացնել. «Սկսենք Ալիկ Սարգսյանի հուզումնալից ասուլիսից: Նա ասում է, որ միջադեպում մեղավոր են ՀԱԿ ակտիվիստները: Ասուլիսում դեպքի մանրամասները ներկայացնելիս իրադարձությունները նկարագրում է՝ որպես ապացուցված ճշմարտություն: Նախկին ոստիկանապետը խախտել է անմեղության կանխավարկածը: Նա ազդեցություն է գործել նախաքննության վրա, հայտարարել է, որ ինքն է որոշել, թե ոստիկանների որ վերքերը նշվեն, որոնք՝ ոչ»:
Կարդացեք նաև
Սարգիս Գեւորգյանն անդրադարձավ նաեւ Հրանտ Միրիջանյանի հայտարարությանը, ըստ որի՝ ինքը կեղծ ցուցմունք է տվել, իրեն ստիպել են:
Սարգիս Գեւորգյանը հայտարարեց, որ դատարանը կատարում է քաղաքական պատվեր, հակառակ դեպքում չէր մերժի հայտնի մարդկանց ստորագրություններով միջնորդությունը՝ փոխելու Տիգրան Առաքելյանի խափանման միջոցը:
Նա կոչ արեց դատավորին արդարացման դատավճիռ կայացնել, դրսեւորել առանձնահատուկ համարձակություն եւ կամք՝ հակառակվելու իրենց վերահսկողներին:
Հռիփսիմե ՋԵԲԵՋՅԱՆ
