«Դժգոհությունը այն բանի հետ է կապված, որ նախագծով նախատեսվում է, որ յուրաքանչյուր փաստաբան յուրաքանչյուր ամիս լրացուցիչ 5000 դրամ պետք է վճարի, կարծեք թե տեղին է: Դուք որեւէ երկիր չեք գտնի, որտեղ մեկից մի քիչ ավելի գումար վերցնեն, ու ինքը չդժգոհի»,-այսօր կառավարության նիստից հետո լրագրողներին ասաց արդարադատության նախարար Հրայր Թովմասյանը, պատասխանելով այն դիտարկմանը, որ Փաստաբանների պալատի անդամները ավազակություն են համարում կառավարության այն որոշումը, ըստ որի փաստաբանները հավելյալ գումարներ պետք է վճարեն եւ դա ուղղակի բյուջե լցնել է:
«Այո այդպես է, ամբողջ աշխարհում փորձում են բյուջե լցնել, որեւէ վատ բան չեմ տեսնում: Այդ գումարները ուղղվելու են իրավաբանական օգնություն ցուցաբերելուն»,-ասաց Հրայր Թովմասյանը:
Նախարարի ներկայացմամբ` կառավարություն ներկայացրած նախագծով, փաստաբանների պալատին չեն զրկում փաստաբաններին արտոնագիր տալու լիազորությունից:
Հրայր Թովմասյանը նաեւ հավելեց, որ Մռավյան դպրոցը մոտ 15 օրից որպես փաստաբանական դպրոց կհանձնվի պալատին:
Կարդացեք նաև
Լրագրողները նաեւ ճշտեցին, թե որքանո՞վ է իրականությանը համապատասխանում մամուլում շրջանառվող լուրը, ըստ որի ՀՀ նախագահի աշխատակազմի ղեկավար Վիգեն Սարգսյանը սահմանադրական բարեփոխումների հանձնաժողովին առաջարկ է ներկայացրել ՀՀ նախագահի թեկնածուի` վերջին 10 տարում Հայաստանում բնակվելու վերաբերյալ:
Նախարարն ասաց, որ մի շարք առաջարկներ են ստացել Ընտրական օրենսգրքի փոփոխության վերաբերյալ, իսկ նախագահի նստակեցության ցենզի վերաբերյալ առաջարկը ստացել են ԵԱՀԿ/ԺՀՄԻԳ-ից, այլ ոչ թե Վիգեն Սարգսյանից:
Մանրամասն` տեսանյութում
Նելլի ԲԱԲԱՅԱՆ
